இந்திய கிரிக்கெட் கட்டுப்பாட்டு வாரியத்தின் (BCCI) அடுத்த தலைவராக கிரிக்கெட் திலகம் சச்சின் டெண்டுல்கர் பொறுப்பேற்கலாம் எனும் தகவல்கள் தற்போது பரவலாக பேசப்பட்டு வருகின்றன.
52 வயதான சச்சின் டெண்டுல்கர், இந்திய அணிக்காக 200 டெஸ்ட் போட்டிகளில் 15,921 ரன்களும், 463 ஒருநாள் போட்டிகளில் 18,426 ரன்களும் சேர்த்தவர். சர்வதேச கிரிக்கெட்டில் அசாதாரண சாதனைகள் படைத்த அவருக்கு, மத்திய அரசு நாட்டின் உயரிய விருதான பாரத ரத்னாவையும் வழங்கியுள்ளது.
சர்வதேச கிரிக்கெட்டில் இருந்து ஓய்வு பெற்ற பின்னரும், சச்சின் தொடர்ந்து கிரிக்கெட் குறித்த தனது கருத்துகளை பகிர்ந்து வருகிறார். சமூக வலைதளங்களில் அவர் ஆக்டிவாக இருந்து, இளம் வீரர்களையும் அணிகளையும் பாராட்டி ஊக்குவிப்பது வழக்கம்.
தற்போது பிசிசிஐ தலைவராக உள்ள ரோஜர் பின்னி, 70 வயது நிறைவு செய்யவுள்ள நிலையில், அந்த வயதை கடந்தவர்கள் பொறுப்பில் தொடர முடியாது என்பது பிசிசிஐ விதி. இதனையடுத்து புதிய தலைவர் விரைவில் அறிவிக்கப்படுவார் என்று எதிர்பார்க்கப்படுகிறது.
இந்த நிலையில், அடுத்த தலைவராக சச்சின் டெண்டுல்கர் தேர்வு செய்யப்படலாம் என்ற தகவல்கள் கிரிக்கெட் வட்டாரங்களில் தீவிரமாக பரவி வருகின்றன. விரைவில் இதுகுறித்து அதிகாரப்பூர்வ அறிவிப்பு வெளியாகும் என நிபுணர்கள் கூறுகின்றனர்.
