நகை கடன்களுக்கான கட்டுப்பாடுகளை தளர்த்தியது ஆர்பிஐ!. என்னென்ன விதிகள் தெரியுமா?.

சென்னை: வங்கிகள் மூலம் தங்க நகை கடன் பெறும் முறையில், இந்திய ரிசர்வ் வங்கி (RBI) சமீபத்தில் புதிய கட்டுப்பாடுகளை கொண்டு வந்தது. குறிப்பாக, அடகு வைக்கும் நகைகளுக்கான ரசீதை கட்டாயமாக சமர்ப்பிக்க வேண்டும் என்ற விதிமுறை பெரும் எதிர்ப்பை சந்தித்தது.

இந்த விதிமுறைகள் கிராமப்புற மக்கள் மற்றும் மகளிர் கூட்டுறவு சமூகங்களுக்கு கடன்களைப் பெறும் வழியை சிரமமாக மாற்றும் என்பதைக் கொண்டு, தமிழக முதல்வர் மு.க. ஸ்டாலின் உட்பட பலர் மத்திய அரசு மற்றும் ரிசர்வ் வங்கிக்கு கடிதம் எழுதி இந்த மாற்றங்களை திரும்பப் பெறக் கேட்டனர்.

இதனிடையே, மதுரை மக்களவை உறுப்பினர் சு. வெங்கடேசன் தங்க நகை கடனுக்கான நடைமுறையில் 10 முக்கிய மாற்றங்கள் செய்யவேண்டும் எனக் கோரிய கடிதத்தை மத்திய நிதி அமைச்சர் நிர்மலா சீதாராமனுக்கும், ரிசர்வ் வங்கி ஆளுநருக்கும் அளித்திருந்தார்.

இப்போது அந்தக் கோரிக்கைகளுக்கு பதிலளிக்கும்படி, ஆர்பிஐ புதிய விதிமுறைகளை தளர்த்தி அறிவித்துள்ளது. இது மக்களுக்கு பெரும் நிம்மதி அமைந்துள்ளது.

புதிய விதிமுறைகளின் முக்கிய அம்சங்கள்:

ரசீது தேவையில்லை:
இனிமேல் தங்க நகைக்கு ரசீதை வேண்டியதில்லை. “இந்த நகை எனது சொந்தம்” என்று கடனாளி சுய அறிக்கை கொடுத்தாலே போதுமானது.

தாய்மொழியில் ஆவணங்கள்:
கடனாளியின் மொழியில் – குறிப்பாக மாநில மொழியில் அல்லது அவருக்கு வசதியான மொழியில் – கடன் ஆவணங்கள் வழங்கப்பட வேண்டும்.

உடனடி அமல்:
இந்த புதிய விதிமுறைகள் உடனடியாக அமலில் வரும். முழுமையாக நடைமுறைக்கு வரவேண்டிய கடைசி தேதி – ஏப்ரல் 1, 2026.

மதிப்பீட்டு அடிப்படையில் கடன்:

• ₹2.5 லட்சம் வரை – நகை மதிப்பில் 85% வரை கடன்
• ₹2.5 லட்சம் முதல் ₹5 லட்சம் வரை – 80%
• ₹5 லட்சத்திற்கு மேல் – 75%

மீண்டும் விண்ணப்பிக்க வேண்டாம்:
முந்தைய கடனுக்கு ரீனியுவல் (renewal) அல்லது கூடுதல் கடன் (top-up) பெற புதிய விண்ணப்பம் தேவையில்லை. பழைய விபரங்களின் அடிப்படையில் தொடரலாம்.

சட்டவிரோதமாக மூன்றாம் நபருக்குத் தடுப்பு:
கடன் தொகை நேரடியாக கடனாளியின் கணக்கில் மட்டுமே செலுத்தப்பட வேண்டும். மூன்றாம் நபரின் கணக்கில் பணம் செலுத்தக்கூடாது.

நகையை உடனடியாக திருப்பித்தர வேண்டும்:
கடன் முழுமையாக செலுத்தியதும், அன்றே அல்லது அதிகபட்சமாக 7 வேலை நாட்களுக்குள் நகையை திருப்பித் தர வேண்டும். தாமதம் ஏற்பட்டால், வங்கி ரூ.5,000 இழப்பீடு வழங்க வேண்டும்.

விவசாய கடன் நோக்கம் சரிபார்ப்பு தேவையில்லை:
விவசாயம் அல்லது அவசர தேவைக்காக கடன் பெறும் நிலையில், எதற்காகக் கடன் பெறப்படுகிறது என்பதை நிறுவனம் உறுதி செய்ய வேண்டிய சட்டபூர்வப் பொறுப்பு நீக்கப்பட்டுள்ளது.

தங்க நாணயக் கட்டுப்பாடு நீக்கம்:
22 கேரட் மற்றும் அதற்கு மேல் தூய்மையான தங்க நாணயங்களுக்கே மட்டும் கடன் வழங்கப்படும் என்ற பழைய கட்டுப்பாடு தற்போது நீக்கப்பட்டுள்ளது.

முன்னதாக மறுக்கப்பட்ட கடன்களுக்கும் வாய்ப்பு:
2024 செப்டம்பர் 30 வரை மறுக்கப்பட்ட கடன்களும் தற்போது புதுப்பிக்கப்படலாம் அல்லது கூடுதல் கடன்கள் வழங்கப்படும்.

“இந்திய ரிசர்வ் வங்கியின் வரலாற்றிலேயே இதுபோன்ற தீர்மானம் இது முதல் முறையாக தான் எடுக்கப்பட்டுள்ளது,” என மகிழ்ச்சியுடன் தெரிவித்துள்ளார் எம்.பி. சு. வெங்கடேசன். அவர் மேலும் கூறுகையில், “எங்களின் 10 கோரிக்கைகள் அனைத்தையும் ஆர்பிஐ ஏற்றுக்கொண்டு விதிமுறை மாற்றங்களை செய்துள்ளதான செய்தி, மக்களின் உரிமையை பாதுகாக்கும் மிகப்பெரிய வெற்றி,” என்றும் குறிப்பிட்டுள்ளார்.

இந்த மாற்றங்கள் மூலம், சாதாரண மக்களும், விவசாயிகளும் தங்க நகைக்கடனை எளிதாகப் பெற முடியும் என்பதோடு, வங்கிகளில் நடைபெறும் நடைமுறைகள் மக்கள்தோடு நேரடி இணைப்புடன் இருக்கும் வகையிலும் அமைந்துள்ளது.