தமிழகத்தின் முன்னாள் முதலமைச்சரும், அனைத்திந்திய அண்ணா திராவிட முன்னேற்றக் கழகத்தின் நிறுவனருமான புரட்சித் தலைவர் எம்.ஜி.ஆரின் 38-வது ஆண்டு நினைவு தினம் நேற்று நாமக்கல் மாவட்டம் முழுவதும் அதிமுகவினரால் உணர்ச்சிப்பூர்வமாக அனுசரிக்கப்பட்டது. மாவட்டத்தின் முக்கிய நகரங்கள் மற்றும் ஒன்றியப் பகுதிகளில் உள்ள அவரது சிலைகளுக்கும், திருவுருவப் படங்களுக்கும் கட்சி நிர்வாகிகள் மற்றும் தொண்டர்கள் மாலை அணிவித்து, மலர் தூவி அஞ்சலி செலுத்தினர். பல இடங்களில் ஏழை எளிய மக்களுக்கு நலத்திட்ட உதவிகளும் வழங்கப்பட்டன.
நாமக்கல் நகரில், நாமக்கல் – பரமத்தி சாலையில் அமைந்துள்ள மாநகராட்சி செலம்ப கவுண்டர் பூங்கா வளாகத்தில் உள்ள எம்.ஜி.ஆர் சிலைக்கு, முன்னாள் சட்டமன்ற உறுப்பினரும், அதிமுக நகரச் செயலாளருமான பாஸ்கர் தலைமையில் அக்கட்சியினர் மாலை அணிவித்து மரியாதை செலுத்தினர். இதேபோல், சேந்தமங்கலம் மற்றும் காளப்பநாயக்கன்பட்டி பகுதிகளில் முன்னாள் எம்.எல்.ஏ சந்திரசேகரன் தலைமையிலும், திருச்செங்கோட்டில் அதிமுக தலைமை பொதுக்குழு உறுப்பினர் பொன்சரஸ்வதி தலைமையிலும் அஞ்சலி நிகழ்வுகள் நடைபெற்றன. ராசிபுரத்தில் முன்னாள் அமைச்சரும், மாவட்ட மகளிர் அணி நிர்வாகியுமான சரோஜா தலைமையில் கட்சி நிர்வாகிகள் எம்.ஜி.ஆர் சிலைக்கு மாலை அணிவித்து மரியாதை செய்த பின், கருப்பு பேட்ஜ் அணிந்து முக்கிய வீதிகள் வழியாக மவுன ஊர்வலமாகச் சென்று தங்களது அஞ்சலியைப் பதிவு செய்தனர்.
பள்ளிப்பாளையம் பகுதியில் நடைபெற்ற நினைவு தின நிகழ்வில் முன்னாள் அமைச்சர் பி.தங்கமணி கலந்துகொண்டு, பேருந்து நிலையம் அருகே அலங்கரித்து வைக்கப்பட்டிருந்த எம்.ஜி.ஆரின் திருவுருவப் படத்திற்கு மலர் தூவி அஞ்சலி செலுத்தினார். இதனைத் தொடர்ந்து, அவரது தலைமையில் திரளான தொண்டர்கள் பங்கேற்ற பிரம்மாண்ட மவுன ஊர்வலம் நடைபெற்றது. பள்ளிப்பாளையம் பேருந்து நிலையத்தில் தொடங்கிய இந்த ஊர்வலம் ஆவாரங்காடு பகுதி வரை சென்றது. ஊர்வலத்தில் பங்கேற்றவர்கள் எம்.ஜி.ஆரின் மக்கள் நலத் திட்டங்களைப் போற்றும் வகையில் மவுனமாகச் சென்றனர்.
மாவட்டம் முழுவதும் நடைபெற்ற இந்த நிகழ்வுகளில் மாவட்ட, ஒன்றிய, நகர மற்றும் கிளைக் கழக நிர்வாகிகள், உள்ளாட்சிப் பிரதிநிதிகள் மற்றும் பொதுமக்கள் பெருந்திரளாகக் கலந்துகொண்டனர். பொற்கால ஆட்சி தந்த மக்கள் திலகத்தின் நினைவைப் போற்றும் வகையில் நடைபெற்ற இந்த அஞ்சலி கூட்டங்கள் மற்றும் மவுன ஊர்வலங்களால் நாமக்கல் மாவட்டத்தின் முக்கிய இடங்கள் நேற்று அதிமுகவினரின் கூட்டத்தால் நிரம்பி வழிந்தன.
