ஹாலிவுட் நடிகை சிட்னி ஸ்வீனி இந்திய சினிமாவில் நடிக்கப்போகிறார் என்ற தகவல் வெளிவந்து பெரும் கவனம் ஈர்த்துள்ளது.
பிரிட்டனின் தி சன் பத்திரிகை வெளியிட்ட தகவலின்படி, ஒரு முன்னணி இந்திய தயாரிப்பு நிறுவனம் சிட்னி ஸ்வீனியுடன் ₹530 கோடிக்கு மேல் ஒப்பந்தம் செய்துள்ளதாக கூறப்படுகிறது. இதில் சுமார் ₹415 கோடி அவரின் நடிப்புக்கான கூலியாகவும், மீதமுள்ள ₹115 கோடி விளம்பர ஒப்பந்தங்களுக்காகவும் வழங்கப்படவுள்ளதாக தகவல்கள் வெளியாகியுள்ளன.
சர்வதேச காதல் கதை
இந்தப் படத்தில் சிட்னி ஸ்வீனி, ஒரு இளம் அமெரிக்க நட்சத்திரமாக களமிறங்கி, இந்திய ஹீரோவுடன் காதலில் விழும் கதாபாத்திரத்தில் நடிக்கிறார் எனத் தெரிவிக்கப்படுகிறது.
பெரும் பட்ஜெட்டில் உருவாகவிருக்கும் இந்த படத்தின் படப்பிடிப்பு நியூயார்க், பாரிஸ், லண்டன் மற்றும் துபாய் போன்ற சர்வதேச நகரங்களில் 2026 தொடக்கத்தில் துவங்கும் என கூறப்படுகிறது.
உலகளாவிய வர்த்தக நோக்கம்
சிட்னியின் உலக ரசிகர் பட்டாளத்தை பயன்படுத்தி, இந்த படத்தை சர்வதேச சந்தையிலும் மிகப்பெரிய அளவில் வெளியிட தயாரிப்பாளர்கள் திட்டமிட்டுள்ளனர்.
சிட்னி ஸ்வீனி இவ்வளவு பெரிய தொகைக்கு அதிர்ச்சி அடைந்தாலும், கதைக்களம் அவரை கவர்ந்ததாக சில வட்டாரங்கள் கூறுகின்றன. இதுவரை அவரது தரப்பில் இருந்து அதிகாரப்பூர்வ விளக்கம் எதுவும் வெளிவரவில்லை
