பெருநகர சென்னை மாநகராட்சி, பொதுமக்களுக்கு இலகுவான முறையில் சேவைகளை வழங்க புதிய முயற்சியில் ஈடுபட்டுள்ளது. வாட்ஸ்ஆப் செயலியின் மூலம் பல்வேறு சேவைகளை பெறக்கூடிய வகையில், செயற்கை நுண்ணறிவு (AI) அடிப்படையிலான சாட்பாட் அமைப்பை உருவாக்கும் திட்டம் தீவிரமாக நடைபெற்று வருகிறது.
வாட்ஸ்ஆப்பில் என்னென்ன செய்யலாம்?
இந்த புதிய வசதி செயல்பாட்டுக்கு வந்தவுடன், மக்கள் தங்கள் பிறப்பு மற்றும் இறப்புச் சான்றிதழ்களை நேரடியாக பதிவிறக்கம் செய்யலாம், சொத்து வரிகளை செலுத்தலாம், புகார்களை பதிவு செய்யலாம். மேலும் தமிழ் மற்றும் ஆங்கிலம் உள்ளிட்ட மொழிகளில் மாநகராட்சியின் அறிவிப்புகளை நேரடியாக பெறும் வசதியும் இத்துடன் இணைக்கப்படும்.
மாநகராட்சி ஆணையர் குமரகுருபரன் கூறுவதாவது:
“பொதுமக்களுடன் நேரடி தொடர்பை ஏற்படுத்தும் வகையில், ஒரே வாட்ஸ்ஆப் எண்ணை நாம் அறிவிப்போம். இந்த சேவை, செயற்கை நுண்ணறிவைப் பயன்படுத்தும் சாட்பாட் மூலம் இயக்கப்படும். மக்கள் தங்கள் தேவைகளை விரைவாகவும், எளிமையாகவும் நிறைவேற்றலாம்.”
இந்த வசதியால், சேவைகள் விரைந்து கிடைக்கும். அரசு மற்றும் மக்களுக்கிடையிலான ஒழுங்கு மற்றும் நம்பிக்கையும் மேம்படும் எனவும் அதிகாரிகள் தெரிவிக்கின்றனர். இதன் மூலம், வரி செலுத்தும் தன்மையும் அதிகரிக்கும் என்று எதிர்பார்க்கப்படுகிறது.
இந்த சாட்பாட் அமைப்பை உருவாக்குவதற்கும் பராமரிப்பதற்கும் தனியார் நிறுவனங்களுக்கு ஒப்படைக்கப்படும். இதற்கான டெண்டர் விரைவில் வெளியிடப்படும் என்றும், இரண்டு மாதங்களில் சேவை தொடங்கும் என்றும் மாநகராட்சி அதிகாரிகள் கூறியுள்ளனர்.
இந்த வசதி தொடங்கினால், நவீன தொழில்நுட்பத்தின் மூலம் நகராட்சி சேவைகள் மக்களுக்கு இன்னும் நெருக்கமாகும்.
