நாடு முழுவதும் கவனம் ஈர்த்த குடியரசு துணைத் தலைவர் தேர்தலில், தமிழ்நாட்டைச் சேர்ந்த பாஜக மூத்த தலைவர் சி.பி. ராதாகிருஷ்ணன் வெற்றி பெற்றுள்ளார்.
தேர்தல் முடிவுகள்
2022ல் தேர்ந்தெடுக்கப்பட்ட துணைத் தலைவர் ஜக்தீப் தன்கர், உடல்நலக் காரணத்தால் கடந்த ஜூலை மாதம் பதவி விலகியதைத் தொடர்ந்து இத்தேர்தல் நடைபெற்றது. நேற்றுக் காலை 10 மணிக்கு தொடங்கிய வாக்குப்பதிவு மாலை 5 மணிக்கு நிறைவடைந்தது.
மொத்தம் 781 எம்.பிக்களில் 767 பேர் வாக்களித்த நிலையில், 98.2% வாக்குகள் பதிவாகின. எண்ணிக்கையில்,
சி.பி. ராதாகிருஷ்ணன் – 452 ஓட்டுகள்
சுதர்சன் ரெட்டி – 300 ஓட்டுகள்
செல்லாத ஓட்டுகள் – 15
இதன் மூலம், 152 ஓட்டுகள் வித்தியாசத்தில் ராதாகிருஷ்ணன் வெற்றி பெற்றதாக தேர்தல் அதிகாரி பிசி மோடி அறிவித்தார். வரும் 12ஆம் தேதி அவர் பதவியேற்பார்.
அரசியல் பரபரப்பு
தே.ஜ. கூட்டணியின் மொத்த பலம் 438 ஆக இருந்த நிலையில், ராதாகிருஷ்ணன் 14 ஓட்டுகள் கூடுதலாகப் பெற்றுள்ளார். அதேசமயம், i-n-d-i-a கூட்டணியின் 315 எம்.பிக்களில் 300 பேர் மட்டுமே வாக்களித்ததால், அக்கூட்டணியிலிருந்து சிலர் பாஜக வேட்பாளருக்கு ஆதரவு தந்தார்களா என்ற சந்தேகம் எழுந்துள்ளது.
பிஜு ஜனதா தளம், பாரத் ராஷ்டிர சமிதி, சிரோண்மணி அகாலி தளம் ஆகிய கட்சிகள் தேர்தலை புறக்கணித்தன.
வாழ்த்துகள் மற்றும் விமர்சனங்கள்
புதிய துணைத் தலைவரை நேரில் சந்தித்து பிரதமர் நரேந்திர மோடி வாழ்த்து தெரிவித்தார். மத்திய அமைச்சர்கள் அமித் ஷா, ராஜ்நாத் சிங், தமிழக முதல்வர் மு.க. ஸ்டாலின் உள்ளிட்டோரும் வாழ்த்து தெரிவித்துள்ளனர்.
பாஜக, எதிரணியிலிருந்தும் மனசாட்சியுடன் வாக்களிக்கப்பட்டதாகக் குறிப்பிட்டு நன்றி தெரிவித்துள்ளது. ஆனால் காங்கிரஸ், “இந்த வெற்றி ஆளும் கட்சியின் தார்மீக தோல்வி” என்றும், 40% வாக்குகளைப் பெற்று எதிரணி தங்களது வலுவான நிலைப்பாட்டை நிரூபித்துள்ளது என்றும் விமர்சித்துள்ளது.
ராதாகிருஷ்ணனின் பயணம்
1957 அக்டோபர் 20 அன்று கோவையில் பிறந்த சி.பி. ராதாகிருஷ்ணன், இளம் வயதிலேயே அரசியலில் இணைந்து ஆர்.எஸ்.எஸ்., ஜனசங்கம் வழியாக பாஜகவில் முக்கியப் பங்காற்றினார்.
1998, 1999ல் கோவை மக்களவைத் தொகுதியில் வெற்றி பெற்றார். பின்னர் பாஜக மாநிலத் தலைவராகவும், தேசிய அளவிலான பல பொறுப்புகளிலும் பணியாற்றினார். 2014இல் கோவை தொகுதியில் போட்டியிட்டு இரண்டாம் இடம் பெற்றது அவரது தனிப்பட்ட செல்வாக்கைக் காட்டியது.
மோடி அரசின் கீழ் தேசிய கயிறு வாரியத் தலைவராக, பாஜக தேசிய செயலாளராக, பின்னர் ஜார்க்கண்ட் மற்றும் மகாராஷ்டிர மாநில ஆளுநராகவும் பணியாற்றியுள்ளார்.
இப்போது, அவர் நாட்டின் 15ஆவது குடியரசு துணைத் தலைவராக தேர்ந்தெடுக்கப்பட்டுள்ளார். “நாட்டின் முன்னேற்றத்திற்காக ஆளும் கட்சியும், எதிர்க்கட்சியும் ஒன்றிணைந்து செயல்பட வேண்டும்” என்று அவர் தனது முதல் உரையில் வலியுறுத்தினார்.
