சென்னையில் பேருந்து நடத்துனர் மீது கொடூரத் தாக்குதல்
காதைக் கடித்து, கத்தியால் கீறிய கும்பல் சிசிடிவி காட்சிகள் வைரல்
இருவர் கைது
சென்னையில் மாநகரப் பேருந்து நடத்துனர் மீது இளைஞர்கள் கும்பல் கொடூரமாகத் தாக்குதல் நடத்திய சம்பவம் பெரும் அதிர்ச்சியை ஏற்படுத்தியுள்ளது. நடத்துனரின் காதைக் கடித்தும், கத்தியால் முதுகில் கீறியும் தாக்குதல் நடத்திய சம்பவம் தொடர்பான சிசிடிவி காட்சிகள் வெளியாகி சமூக வலைதளங்களில் வைரலாகி வருகின்றன. இதையடுத்து, காவல்துறையினர் இரண்டு பேரைக் கைது செய்துள்ளனர்.
சென்னை கண்ணதாசன் நகர் பேருந்து நிலையத்தில் கடந்த 13ஆம் தேதி மாலை சுமார் 5.30 மணியளவில் இந்தச் சம்பவம் நடைபெற்றுள்ளது.
அன்று 2C வழித்தடத்தில் இயக்கப்படும் மாநகரப் பேருந்தை பின்னோக்கி இயக்குவதற்காக நடத்துனர் நித்திய நாதன் விசில் கொடுத்துக் கொண்டிருந்தார். அப்போது அங்கிருந்த இளைஞர் ஒருவர், முன்விரோதம் காரணமாக நடத்துனருடன் வாக்குவாதத்தில் ஈடுபட்டதாகக் கூறப்படுகிறது.
இந்த வாக்குவாதம் சிறிது நேரத்தில் மோதலாக மாறியது. அப்போது ஆத்திரமடைந்த அந்த இளைஞர், நடத்துனர் நித்திய நாதனின் காதைக் கடித்துத் தாக்கியுள்ளார். தொடர்ந்து, அந்த இளைஞரின் நண்பர்களும் அங்கு வந்து நடத்துனரைச் சரமாரியாகத் தாக்கியுள்ளனர்.
மேலும், தாக்குதலில் ஈடுபட்ட கும்பலைச் சேர்ந்த ஒருவர் கத்தியால் நடத்துனரின் முதுகில் கீறிவிட்டு அங்கிருந்து தப்பிச் சென்றதாகக் கூறப்படுகிறது.
இந்தத் தாக்குதல் சம்பவம் தொடர்பான சிசிடிவி காட்சிகள் வெளியாகி தற்போது சமூக வலைதளங்களில் வேகமாகப் பரவி வருகின்றன. பணியில் இருந்த பேருந்து நடத்துனர் மீது நடத்தப்பட்ட இந்தத் தாக்குதல் காட்சிகள் பொதுமக்களிடையே அதிர்ச்சியை ஏற்படுத்தியுள்ளன.
தாக்குதலில் காயமடைந்த நடத்துனர் நித்திய நாதன் முதலில் அருகிலுள்ள மருத்துவமனையில் முதலுதவி சிகிச்சை பெற்றார். பின்னர் மேல் சிகிச்சைக்காக சென்னை அரசு ஸ்டான்லி மருத்துவமனையில் அனுமதிக்கப்பட்டார். தற்போது அவர் நலமுடன் இருப்பதாகத் தெரிவிக்கப்பட்டுள்ளது.
இதற்கிடையே, சம்பவம் தொடர்பாக பேருந்து ஓட்டுநர் அளித்த புகாரின் அடிப்படையில் காவல்துறையினர் நான்கு பேர் மீது வழக்குப் பதிவு செய்து விசாரணை மேற்கொண்டனர். விசாரணையின் தொடர்ச்சியாகத் தாக்குதலில் தொடர்புடையதாகக் கூறப்படும் இரண்டு பேரைக் கைது செய்துள்ளனர். மேலும், இந்தச் சம்பவத்தில் தொடர்புடைய மற்றவர்களைக் குறித்தும் போலீசார் விசாரணை நடத்தி வருகின்றனர்.
பொதுமக்களுக்குச் சேவை வழங்கும் மாநகரப் போக்குவரத்துத் துறை ஊழியர் ஒருவர், பணியில் இருந்தபோதே இத்தகைய கொடூரத் தாக்குதலுக்கு உள்ளான சம்பவம் சென்னையில் பெரும் பரபரப்பை ஏற்படுத்தியுள்ளது.
சிசிடிவி காட்சிகள் வெளியாகி வைரலான நிலையில், இந்தத் தாக்குதல் சம்பவத்தில் இருவர் கைது செய்யப்பட்டிருப்பது குறிப்பிடத்தக்கது.







