பாகிஸ்தான் கிரிக்கெட் அணியின் முன்னாள் கேப்டன் ஷாஹித் அப்ரிடி, இந்திய அரசை விமர்சித்து, காங்கிரஸ் மூத்த தலைவர் ராகுல் காந்தியைப் பாராட்டியிருப்பது அரசியல் விவாதத்தை தூண்டியுள்ளது.
அப்ரிடியின் கருத்து
ஆசியக் கோப்பையில் இந்தியா-பாகிஸ்தான் போட்டிக்குப் பிறகு வீரர்கள் இடையே கைகுலுக்காத சம்பவம் சர்ச்சை ஏற்படுத்தியது. இதுகுறித்து பாகிஸ்தானின் சம்மா டிவியில் பேசிய அப்ரிடி, “இந்திய அரசு மத வேறுபாட்டை அரசியலாக மாற்றுகிறது. ஆனால் ராகுல் காந்தி அனைவரையும் ஒன்றிணைக்க நினைக்கும் மனநிலையோடு இருக்கிறார். அவர் உரையாடலுக்கு முக்கியத்துவம் தருகிறார். இந்தியா இன்னொரு இஸ்ரேலாக மாற வேண்டாம்” என்று கருத்து தெரிவித்தார்.
பாஜகவின் கடும் விமர்சனம்
இதற்கு பதிலளித்த மத்திய அமைச்சர் கிரண் ரிஜிஜு, “ராகுல் காந்தி பாகிஸ்தானின் செல்லப் பிராணி. அவரைத் தங்கள் தலைவராகவே ஆக்கிக்கொள்ளலாம்” என்றார்.
பாஜக ஐடி பிரிவு தலைவர் அமித் மாளவியாவும், அப்ரிடியை “இந்தியாவுக்கு எதிராக தொடர்ந்து விஷம் பேசுபவர்” என்று குற்றம்சாட்டி, “இந்தியாவை வெறுப்பவர்களுக்கு ராகுல் எப்போதும் நெருங்கியவராகத் தோன்றுகிறார்” என பதிவிட்டார்.
எதிர்க்கட்சிகளின் பதிலடி
மாளவியாவின் விமர்சனத்துக்கு பதில் அளித்த சிவசேனா எம்.பி. பிரியங்கா சதுர்வேதி, “சில மாதங்களுக்கு முன் அப்ரிடியுடன் பாஜக எம்.பிக்கள் நட்பு காட்டியதை உலகமே பார்த்தது” என்று சுட்டிக்காட்டினார்.
அதேபோல், காங்கிரஸ் சமூக ஊடகத் தலைவர் சுப்ரியா ஷ்ரினேட், அனுராக் தாக்கூர் – அப்ரிடி புகைப்படத்தை பகிர்ந்து, “நீங்களே நட்பு காட்டினீர்கள்; இப்போது எங்களை ஏன் குறைகூறுகிறீர்கள்” என விமர்சித்தார்.
காங்கிரஸின் நேரடி கண்டனம்
காங்கிரஸ் எம்.பி. அபிஷேக் மனு சிங்வி, அப்ரிடியையே நேரடியாக கடுமையாக விமர்சித்து, “இந்திய பேட்ஸ்மேன்கள் அவரது மருமகனை (ஷாஹீன் ஷா அப்ரிடி) தாக்கும் போது, அவர் அதிகமாகக் கோபம் காட்டுகிறார். ஸ்கோர்போர்டை எதிர்கொள்ளாமல் அரசியல் குற்றச்சாட்டுகளில் மறைவது சரியல்ல” என்று தாக்கம் மிகுந்த கருத்து தெரிவித்தார்.
