நாகை அருகே தீபாவளி பண்டிகை: 100-க்கும் மேற்பட்ட ஆதரவற்றோருக்கு புத்தாடை, இனிப்பு வழங்கி இறையன்பு அறக்கட்டளை நெகிழ்ச்சி கொண்டாட்டம்:
நாகப்பட்டினம் மாவட்டம் திட்டச்சேரி பகுதியைச் சேர்ந்த செந்தமிழன் என்பவர், கடந்த 5 ஆண்டுகளாக ஆதரவற்ற முதியோர்கள் மற்றும் மனநலம் பாதிக்கப்பட்டவர்களை நேரடியாகத் தேடிச் சென்று பல்வேறு உதவிகளை வழங்கி வருகிறார்.
அந்த வகையில், இந்த ஆண்டு தீபாவளி பண்டிகையை முன்னிட்டு ‘இறையன்பு அறக்கட்டளை’ சார்பில் 100-க்கும் மேற்பட்ட ஆதரவற்றோருக்கு புத்தாடைகள், உணவு மற்றும் இனிப்புகள் வழங்கி சிறப்பிக்கப்பட்டது.
அறக்கட்டளையின் நிறுவனர் செந்தமிழன் தலைமையில், அவரது குழுவினரான ஆரோக்கியராஜ், சுரேஷ், ஜெயமணி, வினோத், அபிமணி மற்றும் சிவனேஷ் ஆகியோர் களத்தில் இறங்கி இப்பணிகளை மேற்கொண்டனர்.
குறிப்பாக, உலகப் புகழ்பெற்ற வேளாங்கண்ணி பேராலய வளாகம், வேளாங்கண்ணி பேருந்து நிலையம், நாகப்பட்டினம் பேருந்து நிலையம், நாகூர் தர்கா உள்ளிட்ட மாவட்டத்தின் பல்வேறு முக்கியப் பகுதிகளில் சுற்றித் திரிந்த ஆதரவற்றோர் மற்றும் மனநலம் பாதிக்கப்பட்டோரை நேரில் சந்தித்து, அவர்களுக்குப் புத்தாடை மற்றும் உணவுப் பொட்டலங்களை வழங்கி தீபாவளி வாழ்த்துகளைப் பரிமாறிக் கொண்டனர்.
பண்டிகை நாளில் தங்களை அன்போடு கவனித்து புத்தாடை வழங்கியதைக் கண்டு பலரும் நெகிழ்ச்சி அடைந்தனர். கடந்த ஐந்து ஆண்டுகளாகத் தொடர்ந்து ஆதரவற்றோரின் துயர் துடைக்கும் நோக்கில் முன்னெடுக்கப்பட்டு வரும் இந்த மனிதநேய சேவைக்கு, அப்பகுதி பொதுமக்களும் சமூக ஆர்வலர்களும் தங்களது மனமார்ந்த பாராட்டுகளைத் தெரிவித்து வருகின்றனர்.
