சேத்ரபாலபுரம் ஊராட்சியில் கிராமசபை கூட்டத்தில் தீர்மானங்கள் எழுதாமலேயே பொதுமக்களிடம் கையெழுத்து

தேமங்கலம் ஊராட்சியில் கிராம சபை கூட்டம்: 100 நாள் வேலைத் திட்ட சம்பள பாக்கி குறித்து தீர்மானம்
​

​மகாத்மா காந்தி பிறந்த நாளை முன்னிட்டு, நாகப்பட்டினம் மாவட்டம் தேமங்கலம் ஊராட்சி மன்ற அலுவலகக் கட்டிடத்தில் கிராம சபை கூட்டம் சிறப்பாக நடைபெற்றது.
​இக்கூட்டத்திற்கு மண்டல வட்டார வளர்ச்சி துணை அலுவலர் ராஜ்மோகன் தலைமை வகித்தார். ஊராட்சி செயலர் மனோகரன், ஊராட்சியின் வரவு-செலவு கணக்குகளை வாசித்தார். தொடர்ந்து ஊராட்சியின் அடிப்படைப் பிரச்சனைகள் குறித்து பொதுமக்கள் மற்றும் அதிகாரிகளுடன் விரிவாகக் கலந்தாலோசிக்கப்பட்டது.
​கூட்டத்தில் மகாத்மா காந்தி தேசிய ஊரக வேலை உறுதித் திட்டத்தின் (100 நாள் வேலைத் திட்டம்) கீழ் கடந்த 5 வாரங்களாகப் பணியாளர்களுக்கு ஊதியம் வழங்கப்படாமல் நிலுவையில் உள்ள சூழல் குறித்து விவாதிக்கப்பட்டு, பணத்தை உடனடியாக விடுவிக்கக் கோரி தீர்மானம் நிறைவேற்றப்பட்டது.
​மேலும், வீடுகள் தோறும் குடிநீர் வழங்கும் திட்டத்தின் கீழ் குடிநீர் விநியோகம் செய்யப்படுவதால், குடிநீர்க் கட்டணமாக ஒரு வீட்டிற்கு மாதம் ₹30 வீதம், ஆண்டிற்கு ₹360 வசூலிப்பது என ஒருமனதாக நிர்ணயம் செய்யப்பட்டது. அதனைத் தொடர்ந்து, சுற்றுச்சூழலைப் பாதுகாக்கவும், கிராமத்தைத் தூய்மையாக வைத்திருக்கவும் அனைவரும் தூய்மை உறுதிமொழி ஏற்றுக்கொண்டனர்.
​இந்நிகழ்வில் ஒன்றியப் பொறியாளர் வெற்றி, அரசு அலுவலர்கள், அங்கன்வாடி பணியாளர்கள், கிராம சுகாதார செவிலியர்கள், வருவாய்த் துறையினர், தூய்மைப் பணியாளர்கள் மற்றும் கிராம பொதுமக்கள் திரளாகக் கலந்துகொண்டனர்.