வேளாங்கண்ணி புனித ஆரோக்கிய மாதா பேராலய ஆண்டு பெருவிழா இன்று மாலை கொடியேற்றத்துடன் தொடக்கம்
உலகப் புகழ்பெற்ற நாகப்பட்டினம் மாவட்டம் வேளாங்கண்ணி புனித ஆரோக்கிய மாதா பேராலயத்தின் ஆண்டு பெருவிழா இன்று மாலை வெகு விமரிசையாக கொடியேற்றத்துடன் தொடங்குகிறது. இதையொட்டி வேளாங்கண்ணி நகரம் முழுவதும் விழாக்கோலம் பூண்டுள்ளது.
ஆண்டு பெருவிழாவை முன்னிட்டு, தமிழகம் மட்டுமின்றி வெளி மாவட்டங்கள், வெளி மாநிலங்கள் மற்றும் வெளிநாடுகளில் இருந்தும் பல்லாயிரக்கணக்கான பக்தர்கள் வேளாங்கண்ணிக்கு வருகை தந்துள்ளனர். கொடியேற்ற நிகழ்ச்சியை நேரில் கண்டு மாதாவின் அருளைப் பெறுவதற்காக பல்வேறு பகுதிகளில் இருந்து பக்தர்கள் குழுக்களாகவும், குடும்பத்தினருடனும் வேளாங்கண்ணியை நோக்கி வந்து கொண்டிருக்கின்றனர்.
குறிப்பாக, மாதா சொரூபம் தாங்கிய வாகனங்களுடன் பக்தர்கள் ஊர்வலமாகவும், பல்வேறு பகுதிகளில் இருந்து நடைப்பயணமாகவும் வேளாங்கண்ணிக்கு வந்து கொண்டிருக்கின்றனர். இதனால் பேராலயத்தை சுற்றியுள்ள பகுதிகள் பக்தர்கள் கூட்டத்தால் களைகட்டியுள்ளன.
11 நாட்கள் நடைபெறும் இந்த ஆண்டு பெருவிழாவில், லட்சக்கணக்கான பக்தர்கள் கலந்து கொள்வார்கள் என எதிர்பார்க்கப்படுகிறது. விழா நாட்களில் பக்தர்களின் வருகை தொடர்ந்து அதிகரிக்கும் என்பதால், பாதுகாப்பு ஏற்பாடுகள் தீவிரப்படுத்தப்பட்டுள்ளன.
வேளாங்கண்ணி பேராலய ஆண்டு பெருவிழாவையொட்டி 4 மாவட்ட காவல் கண்காணிப்பாளர்கள் தலைமையில் 3,000-க்கும் மேற்பட்ட போலீசார் பாதுகாப்பு பணியில் ஈடுபடுத்தப்பட்டுள்ளனர். பக்தர்கள் அதிகம் கூடும் பகுதிகள், பேராலய வளாகம், முக்கிய சாலைகள், வாகன நிறுத்துமிடங்கள் உள்ளிட்ட இடங்களில் போலீசார் கண்காணிப்பு பணியில் ஈடுபட்டு வருகின்றனர்.
மேலும், போக்குவரத்து நெரிசலை கட்டுப்படுத்தவும், பக்தர்கள் பாதுகாப்பாக வந்து செல்லவும் பல்வேறு நடவடிக்கைகள் மேற்கொள்ளப்பட்டுள்ளன. கூட்ட நெரிசல் ஏற்படாத வகையில் போலீசார் மற்றும் பாதுகாப்புப் பணியாளர்கள் தொடர்ந்து கண்காணிப்பில் ஈடுபட்டு வருகின்றனர்.
