புழலில் வரலட்சுமி நோன்பு விழா: 1,000 பெண்களுக்கு புடவை, தட்டு உள்ளிட்ட நலத்திட்ட உதவிகள் எம்.எல்.ஏ. விஜய் பிரபு பங்கேற்பு
சென்னை மாதவரம் தொகுதிக்கு உட்பட்ட புழல் பகுதியில், மத்திய பகுதி பொருளாளர் திருமதி மகாலட்சுமி ஜெயக்குமார் அவர்களின் இல்லத்தில் வரலட்சுமி நோன்பை முன்னிட்டு சிறப்பு பூஜை, கலை நிகழ்ச்சிகள் மற்றும் நலத்திட்ட உதவிகள் வழங்கும் நிகழ்ச்சி நடைபெற்றது.
வரலட்சுமி நோன்பை முன்னிட்டு நடைபெற்ற இந்நிகழ்ச்சியில், மாதவரம் சட்டமன்ற உறுப்பினர் விஜய் பிரபு தலைமையில் ஏராளமான பெண்கள், மாணவ–மாணவிகள், சிறுவர்–சிறுமிகள் மற்றும் பொதுமக்கள் கலந்து கொண்டனர்.
விழாவின் முக்கிய நிகழ்வாக, சுமார் 1,000 நபர்களுக்கு புடவை, தட்டு உள்ளிட்ட பொருட்கள் வழங்கப்பட்டன. இதன் மூலம் வரலட்சுமி நோன்பில் கலந்து கொண்ட பெண்கள் மற்றும் பொதுமக்கள் பயனடைந்தனர்.
மேலும், மாணவ–மாணவிகளின் திறமைகளை ஊக்குவிக்கும் வகையில் நாதஸ்வரம், கர்நாடக சங்கீதம், பரதநாட்டியம், வீணை மற்றும் கீபோர்டு இசை உள்ளிட்ட பல்வேறு கலை நிகழ்ச்சிகள் நடைபெற்றன. மாணவர்கள் தங்களது திறமைகளை சிறப்பாக வெளிப்படுத்திய நிலையில், அதனை பொதுமக்கள் ஆர்வத்துடன் கண்டு ரசித்தனர்.
இதனைத் தொடர்ந்து நடைபெற்ற குத்துச்சண்டை போட்டிகளில் வெற்றி பெற்ற வீரர்களுக்கு பதக்கங்கள் மற்றும் சான்றிதழ்கள் வழங்கப்பட்டன. மாதவரம் சட்டமன்ற உறுப்பினர் விஜய் பிரபு, வீரர்களை பாராட்டி அவர்களின் விளையாட்டு திறமைகளை தொடர்ந்து வளர்த்துக் கொள்ள வாழ்த்துகளை தெரிவித்தார்.
நிகழ்ச்சியில் சிறப்பாக பங்கேற்ற மாணவ–மாணவிகளுக்கும் பதக்கங்கள் மற்றும் சான்றிதழ்கள் வழங்கப்பட்டு ஊக்கப்படுத்தப்பட்டனர்.
மேலும், விழாவில் கலந்து கொண்ட பக்தர்கள் மற்றும் பொதுமக்களுக்கு அன்னதானமும் வழங்கப்பட்டது.
ஸ்ரீ சத்ய சாய் பாபா கோவில் அருகே நடைபெற்ற இந்த நிகழ்ச்சியில் ஆன்மிகம், கலை மற்றும் விளையாட்டு திறமைகளை ஒருங்கிணைத்து பொதுமக்கள் மற்றும் மாணவர்களை ஊக்குவிக்கும் வகையில் பல்வேறு நிகழ்ச்சிகள் நடைபெற்றது குறிப்பிடத்தக்கது.
