தூத்துக்குடி மாவட்டத்தின் கடற்கரையோர மற்றும் ஊரகக் கிராம மக்களின் நீண்டகாலத் தேவையைப் பூர்த்தி செய்யும் வகையில், அதானி பவுண்டேஷன் மற்றும் மோக்ஸி பவர் ஜெனரேஷன் லிமிடெட் நிறுவனங்கள் இணைந்து ரூ.39.78 லட்சம் மதிப்பிலான நான்கு புதிய சுத்திகரிக்கப்பட்ட குடிநீர் மையங்களைத் திறந்து வைத்துள்ளன. மோக்ஸி பவர் ஜெனரேஷன் லிமிடெட் நிறுவனத்தின் சமூக மேம்பாட்டுத் திட்டங்களின் (CSR – Corporate Social Responsibility) ஒரு பகுதியாக இத்திட்டம் செயல்படுத்தப்பட்டுள்ளது. தருவைக்குளம், பட்டினமருதூர், சக்கம்மாள்புரம் மற்றும் மேல மருதூர் ஆகிய நான்கு கிராமங்களில் இந்த நவீன குடிநீர் சுத்திகரிப்பு நிலையங்கள் அமைக்கப்பட்டுள்ளன. தூய்மையான குடிநீர் கிடைப்பதில் சவால்களைச் சந்தித்து வந்த இப்பகுதி மக்களுக்கு இத்திட்டம் ஒரு வரப்பிரசாதமாக அமைந்துள்ளது.
திட்டத்தின் தொடக்க நிகழ்வாக, தருவைக்குளம் கிராமத்தில் அமைக்கப்பட்டுள்ள பிரம்மாண்ட குடிநீர் மையம் பொதுமக்கள் பயன்பாட்டிற்காகத் திறந்து வைக்கப்பட்டது. இந்த மையம் ஒரு மணி நேரத்திற்கு சுமார் 2,000 லிட்டர் தண்ணீரைச் சுத்திகரிக்கும் அதிநவீனத் திறன் கொண்டது. இதன் மூலம் அக்கிராமத்தைச் சேர்ந்த ஆயிரக்கணக்கான குடும்பங்கள் நாள் முழுவதும் தடையின்றிப் பாதுகாப்பான குடிநீரைப் பெற வழிவகை செய்யப்பட்டுள்ளது. இந்தத் திறப்பு விழாவில் அதானி பவுண்டேஷன் மற்றும் மோக்ஸி பவர் ஜெனரேஷன் லிமிடெட் நிறுவனங்களின் மூத்த அதிகாரிகள் ஜெயதீப் நந்தா, ருத்ர நாராயண பீடி, மனோகர் எத்திராஜ் மற்றும் சுரம்மித்தி நாயக் ஆகியோர் கலந்துகொண்டு மையங்களைச் செயல்பாட்டிற்குக் கொண்டு வந்தனர்.
“பாதுகாப்பான மற்றும் சுத்திகரிக்கப்பட்ட குடிநீர் என்பது அடிப்படைத் தேவை. இத்திட்டத்தின் மூலம் கிராமங்களில் நீர் மூலம் பரவக்கூடிய நோய்கள் பெருமளவு குறையும். பொதுமக்களின் சுகாதாரம் மேம்படுவதோடு, சுத்தமான தண்ணீருக்காக அவர்கள் நீண்ட தூரம் செல்ல வேண்டிய அவசியமும் இனி இருக்காது” என நிறுவன அதிகாரிகள் தெரிவித்தனர். நிறுவனத்தின் இந்த மக்கள் நலப்பணியைப் பாராட்டி, நான்கு கிராமங்களைச் சேர்ந்த பொதுமக்களும், உள்ளாட்சிப் பிரதிநிதிகளும் நன்றிகளைத் தெரிவித்துக் கொண்டனர்.
