கோவை: செம்மொழி பூங்காவில் பணியாற்றும் மாநகராட்சி தூய்மை பணியாளர்களுக்கு குப்பை வண்டியில் உணவு வழங்கப்பட்ட சம்பவம் பெரும் பரபரப்பை ஏற்படுத்தியுள்ளது. இதை தொடர்ந்து, அதிமுக பொதுச் செயலாளர் எடப்பாடி பழனிசாமி மற்றும் பாஜக மாநில தலைவர் நயினார் நாகேந்திரன் இந்த நடவடிக்கையை கடுமையாக கண்டித்து கருத்து தெரிவித்துள்ளனர்.
கோவை காந்திபுரம் மத்திய சிறைச்சாலை வளாகத்தில் 45 ஏக்கர் பரப்பளவில் செம்மொழி பூங்கா அமைக்கும் பணிகள் நடந்து வருகின்றன. பணிகள் இறுதிக் கட்டத்துக்குள் நுழைந்த நிலையில், 15ஆம் தேதி சில அதிகாரிகள் பரிசோதனை செய்தபோது, தூய்மை பணியாளர்களுக்கு உணவு வழங்க குப்பை வண்டியை பயன்படுத்தியதாக தகவல் வெளியாகியுள்ளது. இந்த சம்பவத்தின் புகைப்படங்கள் சமூக வலைதளங்களில் வைரலாகியுள்ளன.
எடப்பாடி பழனிசாமி மற்றும் நயினார் நாகேந்திரன் ஆகியோர் இதனை தூய்மை பணியாளர்களுக்கு உரிய மரியாதை கொடுக்காதது என்றும், மனிதாபிமானமற்ற செயல் என்றும் விமர்சித்துள்ளனர். அவர்கள், உணவு வழங்கும் திட்டங்களை முறையாக செயல்படுத்தி பணியாளர்களுக்கு மரியாதையுடன் பராமரிக்க வேண்டும் என வலியுறுத்தியுள்ளனர்.
