சென்னை கொளத்தூரில் உள்ள வாடகை வீட்டில் பெண் ஒருவர் அழுகிய நிலையில் சடலமாக மீட்கப்பட்ட சம்பவம் அதிர்ச்சியை ஏற்படுத்தியுள்ளது. இந்த சம்பவம் தொடர்பாக ஒருவரை காவல்துறையினர் கைது செய்துள்ளனர்.
கும்மிடிப்பூண்டி இலங்கை தமிழர் அகதிகள் முகாமை சேர்ந்தவர் கணேசன் மூர்த்தி (47), லாரி ஓட்டுநராக பணியாற்றி வருகிறார். இவர், சரஸ்வதி என்ற பெண்ணை 11 ஆண்டுகளுக்கு முன் காதலித்து திருமணம் செய்துள்ளார். தம்பதிக்கு 15 மற்றும் 10 வயதுடைய இரு மகன்கள் உள்ளனர்.
சமீபத்தில் சரஸ்வதி, கொளத்தூரில் உள்ள ஒரு வாடகை வீட்டில் தனியாக குடியேறியிருந்தார். கடந்த இரண்டு நாட்களாக கணவன் பலமுறை தொடர்பு கொள்ள முயன்றும் சரஸ்வதி பதிலளிக்கவில்லை. இதனால் சந்தேகமடைந்த கணேசன், தனது நண்பனை அனுப்பி வீட்டைப் பார்க்கச் சொன்னார். நண்பர் வீட்டிற்கு சென்ற போது, உள்ளிருந்து துர்நாற்றம் வீசியதை பார்த்ததும் உடனே கணேசனை தகவலறிய செய்தார்.
வீட்டுக்கு வந்த கணேசன், பூட்டியிருந்த வீட்டை பார்த்ததும் அக்கம்பக்கத்தினர் வழியாக கொளத்தூர் காவல்துறைக்கு தகவல் அளித்தார். சம்பவ இடத்திற்கு விரைந்த போலீசார் பூட்டை உடைத்து உள்ளே சென்ற போது, சரஸ்வதி அழுகிய நிலையில் சடலமாக இருந்ததை கண்டுபிடித்தனர். உடல் கீழ்ப்பாக்கம் அரசு மருத்துவமனைக்கு அனுப்பி வைத்த போலீசார் வழக்குப் பதிந்து விசாரணை நடத்தினர்.
விசாரணையில், சரஸ்வதிக்கு கஞ்சா மற்றும் மது பழக்கம் இருந்தது தெரியவந்துள்ளது. மேலும், சம்பவ இடத்திலிருந்த கண்காணிப்பு கேமரா காட்சிகளை ஆய்வு செய்த போலீசார், ஒரு வடமாநில இளைஞர் வீட்டில் இருந்து வெளியே செல்லும் வீடியோ பதிவுகளை கண்டறிந்தனர். அதன் அடிப்படையில், மொய்தீன் எனப்படும் அந்த இளைஞரை அவரது மாநிலத்தில் இருந்து கைது செய்தனர்.
இந்தக் கொலை தொடர்பான மேலதிக விசாரணை கொளத்தூர் போலீசாரால் நடைபெற்று வருகிறது.
