விழுப்புரம் : பா.ம.க. நிறுவனர் டாக்டர் ராமதாசை தனிப்பட்ட முறையில் சந்தித்ததாக, ஆடிட்டர் சுரேஷ் குருமூர்த்தி விளக்கம் அளித்துள்ளார். “பா.ஜ.வுக்காக பேச வரவில்லை ; ராமதாஸ் என் நீண்டகால நண்பர்” என்று அவர் தெரிவித்தார்.
தற்போது பா.ம.க.வில், டாக்டர் ராமதாஸுக்கும் அவரது மகன், கட்சி தலைவர் அன்புமணிக்கும் இடையே கருத்து வேறுபாடு தீவிரமடைந்துள்ள நிலையில், இருவரும் தனித்தனியாக செயல்பட்டு வருகிறார்கள். இதன் பின்னணியில், தைலாபுரம் இல்லத்தில் ராமதாசை நேரில் சந்தித்து, அன்புமணியும் பேச்சுவார்த்தை நடத்தியுள்ளார்.
இதற்கிடையே, ஆடிட்டர் குருமூர்த்தியும் அ.தி.மு.க. தலைவர்களில் ஒருவர் சைதை துரைசாமியுடன், ராமதாசை நேரில் சந்தித்து சுமார் 3 மணி நேரம் பேசினார்.
பின்னர் நிருபர்களை சந்தித்த குருமூர்த்தி, “பா.ஜ.வுக்காக நான் வரவில்லை. நண்பராக ராமதாசை சந்தித்தேன். நீண்ட கால உறவைப் போற்றும் வகையில் பேசினோம். அரசியல் தொடர்பான எந்தத் தீர்வையும் பேசவில்லை” என்றார்.
“ராமதாசும், அன்புமணியும் இடையே சமாதானம் பேச வந்தீர்களா?” என்ற கேள்விக்கு, “இல்லை” என்ற பதிலை அவர் தெளிவாக வழங்கினார்.
