சிவகங்கை மாவட்டம் குன்றக்குடியில் முக்கியப் பொது இடங்களாக விளங்கும் காவல் நிலையம் மற்றும் வேளாண் ஆராய்ச்சி நிலைய நுழைவுப்பகுதி ஆகியவை முறையான பராமரிப்பின்றிச் சுகாதாரச் சீர்கேட்டின் பிடியில் சிக்கியுள்ளன. குறிப்பாக, 1966-ஆம் ஆண்டு தொடங்கப்பட்ட குன்றக்குடி வேளாண் ஆராய்ச்சி நிலையம், தமிழ்நாடு வேளாண்மைப் பல்கலைக்கழகத்தின் கீழ் இந்திய வேளாண் ஆராய்ச்சி கவுன்சில் (ICAR) நிதி உதவியுடன் செயல்பட்டு வருகிறது. இப்பகுதி விவசாயிகளுக்கு நவீனத் தொழில்நுட்பப் பயிற்சிகளையும், கிராமப்புற இளைஞர்களுக்கு வேளாண் சார்ந்த வாழ்வாதாரப் பயிற்சிகளையும் வழங்கும் மிக முக்கியமான மையமாகத் திகழ்கிறது. இத்தகைய பெருமைமிக்க நிறுவனத்தின் நுழைவுப் பகுதியிலேயே தற்போது அவல நிலை நீடிக்கிறது.
வேளாண் ஆராய்ச்சி நிலையத்தின் நுழைவு வாயிலையொட்டி அமைந்துள்ள குன்றக்குடி காவல் நிலையத்தின் காம்பவுண்ட் சுவர், தற்போது எந்த நேரத்திலும் இடிந்து விழும் நிலையில் மிகவும் பலவீனமாகக் காணப்படுகிறது. காவல் நிலையத்தைச் சுற்றியுள்ள பகுதிகளில் சீமைக் கருவேல மரங்கள் அடர்ந்து வளர்ந்து முட்புதர்களாகக் காட்சியளிக்கின்றன. மேலும், இப்பகுதியில் உள்ள சாலைகள் நீண்ட நாட்களாகச் சீரமைக்கப்படாததால், குண்டும் குழியுமாக மாறிப் போக்குவரத்திற்கு லாயக்கற்ற நிலையில் உள்ளன. இப்பகுதிக்கு வரும் அதிகாரிகள் மற்றும் பயிற்சிபெற வரும் விவசாயிகள் இந்த மோசமான சாலையினால் கடும் சிரமத்திற்கு ஆளாகின்றனர்.
குன்றக்குடி சண்முகநாதப் பெருமான் கோயிலுக்குத் தினசரி ஆயிரக்கணக்கான பக்தர்கள் வந்து செல்லும் நிலையில், அந்தப் பகுதியில் போதிய கழிப்பறை வசதிகள் இல்லை. இதன் காரணமாக, வெளியூர்களில் இருந்து வரும் பக்தர்கள் மறைவான இடங்களைத் தேடிக் காவல் நிலையத்தின் உடைந்த காம்பவுண்ட் சுவர்ப் பகுதியையே கழிப்பிடமாகப் பயன்படுத்தி வருகின்றனர். இதனால் அப்பகுதி முழுவதும் கடும் துர்நாற்றம் வீசுவதுடன், தொற்று நோய் பரவும் அபாயமும் ஏற்பட்டுள்ளது. வேளாண் ஆராய்ச்சி நிலையத்திற்கு வேலைக்குச் செல்லும் பணியாளர்களும், தொழில்நுட்பப் பயிற்சிக்கு வரும் இளைஞர்களும் மூக்கைப் பிடித்துக்கொண்டு செல்லும் அவல நிலை ஏற்பட்டுள்ளது.
விவசாயிகளுக்கு வழிகாட்டும் ஒரு முக்கிய ஆராய்ச்சி நிலையத்தின் நுழைவு வாயிலும், சட்டம் ஒழுங்கைப் பாதுகாக்கும் காவல் நிலையத்தின் சுற்றுச்சுவரும் இவ்வாறு சிதிலமடைந்து கிடப்பது பொதுமக்களிடையே அதிருப்தியை ஏற்படுத்தியுள்ளது. எனவே, மாவட்ட நிர்வாகம் மற்றும் காவல்துறை உயர் அதிகாரிகள் தலையிட்டு, உடைந்த காம்பவுண்ட் சுவரை உடனடியாகச் சீரமைக்க வேண்டும் என்றும், அங்கு வளர்ந்துள்ள முட்புதர்களை அகற்றித் தூய்மைப் பணிகளை மேற்கொள்ள வேண்டும் என்றும் சமூக ஆர்வலர்கள் கோரிக்கை விடுத்துள்ளனர். மேலும், பக்தர்களின் வசதிக்காகப் போதிய கழிப்பறை வசதிகளை ஏற்படுத்தித் தருவதன் மூலமே இந்தப் பகுதி மீண்டும் பொலிவு பெறும் என்பது அனைவரின் எதிர்பார்ப்பாகும்.
