தீயில் கருகிய ஏழை தம்பதியின் வாழ்க்கை: கண்ணீரைத் துடைக்க ஓடோடி வந்த எம்.எல்.ஏ ஜெயக்குமார் – அதிரடி நிதியுதவி!

திருப்பூர் மாவட்டம் ஊத்துக்குளி ஒன்றியத்திற்கு உட்பட்ட செங்காளிபாளையம் பகுதியில், உழைப்பால் உயர்ந்த ஒரு ஏழைத் தம்பதியின் ஒட்டுமொத்த வாழ்வாதாரமும் தீ விபத்தில் கருகிப் போன சம்பவம் அப்பகுதியில் பெரும் சோகத்தை ஏற்படுத்தியுள்ளது. செங்காளிபாளையத்தைச் சேர்ந்த பாலாஜி – பூங்கொடி தம்பதியினர், இளநீர் வியாபாரம் செய்து தங்களது மகளைக் கல்லூரிக்கு அனுப்பிப் படிக்க வைத்து வருகின்றனர். வழக்கம்போல் நேற்று காலை மகளைக் கல்லூரிக்கு அனுப்பிவிட்டு, தம்பதியினர் வியாபாரத்திற்காகச் சென்றிருந்த நிலையில், காலை சுமார் 11 மணியளவில் அவர்களது வீடு எதிர்பாராதவிதமாகத் திடீரெனத் தீப்பற்றி எரியத் தொடங்கியது. வீட்டில் யாரும் இல்லாத நேரத்தில் பற்றிய தீ, கண் இமைக்கும் நேரத்திற்குள் மளமளவெனப் பரவி வீடு முழுவதும் சூழ்ந்தது.

இந்தக் கோர விபத்தில் அவர்கள் சிறுகச் சிறுகச் சேமித்து வைத்திருந்த பணம், உடுத்தியிருந்த துணிமணிகள், வீட்டு உபயோகப் பொருட்கள் மற்றும் மிக முக்கியமாக மகளின் எதிர்காலத்தைத் தீர்மானிக்கும் கல்விச் சான்றிதழ்கள் அனைத்தும் தீயில் கருகிச் சாம்பலாகின. வியாபாரம் முடிந்து வீடு திரும்பிய தம்பதியினர், தங்கள் கண் முன்னாலேயே தங்களது உழைப்பு அனைத்தும் நாசமாகி இருப்பதைக் கண்டு நிலைகுலைந்து கண்ணீர் வடித்தனர். இந்தத் துயரச் சம்பவம் குறித்துத் தகவல் அறிந்த ஈரோடு புறநகர் கிழக்கு மாவட்ட அதிமுக செயலாளரும், முன்னாள் அமைச்சருமான கே.சி.கருப்பணன், பாதிக்கப்பட்ட குடும்பத்தினருக்குத் தாமதமின்றி உடனடி உதவிகளை வழங்குமாறு கேட்டுக்கொண்டார்.

அவரது ஆலோசனையின் பேரில், ஊத்துக்குளி பகுதி சட்டமன்ற உறுப்பினர் ஜே.கே.எஸ்.ஜெயக்குமார் உடனடியாகச் சம்பவ இடத்திற்கு நேரில் விரைந்து சென்று, உடமைகளை இழந்து தவித்த பாலாஜி – பூங்கொடி தம்பதியினரைச் சந்தித்து ஆறுதல் கூறினார். அப்போது, அவர்களுக்குத் தற்காலிக நிவாரணமாக ரூ.10,000 ரொக்கப்பணத்தை வழங்கியதுடன், உடனடியாகச் சமைப்பதற்குத் தேவையான அரிசி, மளிகைப் பொருட்கள், புதிய சமையல் பாத்திரங்கள் மற்றும் புத்தாடைகள் உள்ளிட்ட அத்தியாவசியப் பொருட்களை வழங்கினார். மேலும், தீ விபத்தில் முற்றிலும் சேதமடைந்த அவர்களது வீட்டிற்கு மாற்றாக, புதிய வீடு கட்டித் தருவதற்கான உரிய நடவடிக்கைகள் விரைந்து எடுக்கப்படும் என்றும் அவர் உறுதி அளித்தார். எம்.எல்.ஏ-வின் இந்தத் திடீர் வருகையும், உடனடி உதவியும் அந்த ஏழைத் தம்பதிக்கு இக்கட்டான சூழலில் பெரும் நம்பிக்கையை அளித்துள்ளது.