சிவகங்கை மாவட்டம் தேவகோட்டை சேர்மன் மாணிக்க வாசகம் நடுநிலைப் பள்ளியில், இந்திய மறுமலர்ச்சியின் நாயகர் சுவாமி விவேகானந்தரின் பிறந்தநாளை முன்னிட்டு ‘தேசிய இளைஞர் தின விழா’ எழுச்சியுடன் கொண்டாடப்பட்டது. பள்ளித் தலைமை ஆசிரியர் லெ. சொக்கலிங்கம் தலைமை தாங்கிய இந்நிகழ்ச்சியில், ஆசிரியை முத்துலெட்சுமி வரவேற்புரை ஆற்றினார். விழாவில் சிறப்பு விருந்தினராகத் தேவகோட்டை ஆனந்தா கல்லூரி முதல்வர் ஜார்ஜ் பெர்னாண்டஸ் கலந்துகொண்டு, மாணவப் பருவத்திலேயே நற்பண்புகளை வளர்த்துக்கொள்வதன் அவசியத்தையும், விவேகானந்தரின் வாழ்வியல் தத்துவங்களையும் விளக்கிப் பேசினார்.
மாணவர்களிடையே உரையாற்றிய ஜார்ஜ் பெர்னாண்டஸ், சுவாமி விவேகானந்தர் சிகாகோ மாநாட்டில் “சகோதர, சகோதரிகளே” என்று அழைத்து உலகையே வியக்க வைத்ததைச் சுட்டிக்காட்டினார். எல்லைகளைக் கடந்து அனைத்து மனிதர்களையும் நேசித்த விவேகானந்தரின் பரந்த மனப்பான்மையை மாணவர்கள் தங்கள் வாழ்க்கையில் பின்பற்ற வேண்டும் என்று கேட்டுக்கொண்டார். துணிவு, வீரம் மற்றும் பண்பு ஆகியவற்றோடு சிந்தித்துச் செயல்படும் விவேகத்தையும் வளர்த்துக்கொண்டால் மட்டுமே ஒரு மாணவர் நாட்டின் சிறந்த குடிமகனாக உருவாக முடியும் என அவர் வலியுறுத்தினார். குழந்தைப் பருவத்திலிருந்து இளைஞர் பருவத்திற்குச் செல்லும் போது, மாணவர்கள் தங்களுக்குள் ஒளிந்திருக்கும் தனித்திறமைகளை ஆசிரியர்களின் வழிகாட்டுதலோடு வெளிக்கொண்டு வந்து, விவேகானந்தர் கனவு கண்ட வலிமையான இந்தியாவை உருவாக்கப் பாடுபட வேண்டும் என அவர் வேண்டுகோள் விடுத்தார்.
இவ்விழாவை முன்னிட்டு மாணவர்களுக்கு விவேகானந்தரின் பொன்மொழிகள் கூறும் போட்டி நடத்தப்பட்டது. இதில் வெற்றி பெற்ற ரித்திகா, நந்தனா, ஜெயகாந்தன், பிரணவி, ஜெபிகா, நித்திஷா, ஹாஷினி மற்றும் அஜய் ஆகிய மாணவர்களுக்குச் சிறப்பு விருந்தினர் பரிசுகளை வழங்கிப் பாராட்டினார். மழலை மொழியில் மாணவர்கள் விவேகானந்தரின் வீர உரைகளை முழங்கியது பார்வையாளர்களை ஆச்சரியத்தில் ஆழ்த்தியது. விழாவின் நிறைவாக ஆசிரியை வள்ளிமயில் நன்றியுரை கூறினார். பள்ளி ஆசிரியர்கள், மாணவர்கள் மற்றும் பெற்றோர்கள் திரளாகக் கலந்துகொண்ட இந்நிகழ்ச்சி, வருங்காலத் தூண்களான மாணவர்களிடையே தேசப்பற்றையும் தன்னம்பிக்கையையும் விதைக்கும் விதமாக அமைந்தது.
