சென்னை: 2026 சட்டமன்றத் தேர்தல் நெருங்கும் நிலையில், தமிழ்நாடு அரசியல் சூழல் மீண்டும் பரபரப்பை எட்டியுள்ளது. அதிமுகவில் நீண்டநாளாக நிலவி வரும் அதிருப்தி காரணமாக, பல சீனியர் தலைவர்கள் மாற்று அரசியல் தளங்களைத் தேடி வருகின்றனர். அந்தப் பட்டியலில் தற்போது முக்கியமானவர் கொங்கு மண்டலத்தின் முன்னாள் அமைச்சர் செங்கோட்டையன். கட்சியிலிருந்து நீக்கப்பட்ட பின்னர் அவர் பாஜக உள்ளிட்ட சில கட்சிகளுடன் தொடர்பில் இருந்ததாக செய்திகள் வெளிவந்தன. ஆனால் அந்த முயற்சிகள் உறுதியாக முன்னேறாததால், அவர் தவெகவின் நோக்கில் நகர்ந்து வருவதாக அரசியல் வட்டாரங்கள் தெரிவிக்கின்றன.
தவெக தேர்தல் மேலாண்மை பொறுப்பாளர்களான ஆதவ் அர்ஜுனா மற்றும் ஜான் ஆரோக்கியசாமி ஆகியோருடன் செங்கோட்டையன் அண்மையில் நடத்திக்கொண்ட பேச்சுவார்த்தைகள் மிகச் சிறப்பாக முடிந்ததாகக் கூறப்படுகிறது. அவரை தவெகவில் சேர்க்கும் நடவடிக்கைகள் இறுதிக்கட்டத்தை எட்டியுள்ள நிலையில், இதற்கான முக்கியமான ஆலோசனை விஜய்யுடன் விரைவில் நடைபெறவுள்ளது. விஜய் – செங்கோட்டையன் சந்திப்பு உறுதிசெய்யப்பட்டதும், நவம்பர் 27 ஆம் தேதி செங்கோட்டையன் தவெகவில் சேரும் நிகழ்வு நடத்தப்படும் என்றும் தகவல் வெளியாகியுள்ளது.
கொங்கு மண்டலத்தில் வலுவான ஆதரவு கொண்ட செங்கோட்டையனுக்கு, தமிழ்நாட்டின் மூத்த அரசியல் தலைவர்களில் ஒருவராக இருப்பதன் அடிப்படையில், தவெகவில் பாரிய பொறுப்பு வழங்கப்படலாம் என எதிர்பார்க்கப்படுகிறது. இதேவேளை, எடப்பாடி பழனிசாமி நவம்பர் 30 அன்று கோபிசெட்டிப்பாளையத்தில் நடத்த உள்ள பொதுக்கூட்டத்திற்கு முன்பாகவே செங்கோட்டையன் தனது அடுத்த அரசியல் முடிவை அறிவிக்கத் திட்டமிட்டுள்ளார் என நெருங்கிய வட்டாரங்கள் தெரிவிக்கின்றன. இதனால் அரசியல் பரபரப்பு மேலும் உயரும் சூழல் ஏற்பட்டுள்ளது.
தமிழக அரசியல் ஏற்கனவே நான்கு முனைப் போட்டிக்கான பாதையில் நகர்கிறது. திமுக ஆட்சியை தக்கவைக்க தந்திரப்பணியில் இறங்கியுள்ள நிலையில், அதிமுக–பாஜக கூட்டணி மீண்டும் ஆட்சியை பிடிக்க முயற்சி செய்கிறது. நாம் தமிழர் தனித்துப் போட்டியிடத் தயாராகியுள்ளது. மற்றொரு புறம் நடிகர் விஜய்யின் தவெக தனிக்கூட்டணி அமைப்பதற்கான முயற்சியை தீவிரப்படுத்தி வருகிறது. இந்நிலையில் செங்கோட்டையனின் தவெகவில் இணைவு, வருகின்ற தேர்தல் கணக்கில் புதிய மாற்றத்தை ஏற்படுத்தும் முக்கிய அரசியல் முன்னேற்றமாகக் கருதப்படுகிறது.
