திண்டுக்கல் மாவட்டம் பழநியில் உள்ள தண்டாயுதபாணி சுவாமி மலைக்கோயிலில் கார்த்திகை மாத தொடக்கத்துடன் ஐயப்ப பக்தர்கள் வருகை அதிகரித்து உள்ளது. கடந்த நாட்களாக ஆந்திர மாநிலத்திலிருந்து வந்த பக்தர்களுடன், தற்போது தமிழகத்திலிருந்தும் பெருமளவில் ஐயப்ப பக்தர்கள் வருவதால் பழநி நகரம் சந்தோஷ வெள்ளத்தில் காணப்படுகிறது.
பக்தர்கள் அதிகாலை 4.30 மணி முதலே படிப்பாதை வழியாக மலைக்கோயிலுக்குச் செல்வதால், குளிர் மற்றும் அவ்வப்போது பெய்யும் மழையால் ஏற்படும் சிரமங்களை கருத்தில் கொண்டு கோயில் நிர்வாகம் புதிய ஏற்பாடுகளை செய்துள்ளது. முன்பு படிப்பாதையில் பக்தர்களுக்கு இலவசமாக மோர் வழங்கப்பட்டிருந்த நிலையில், தற்போது கடும் பனித்தாக்கம் அதிகரித்திருப்பதால் சுடச்சுட சுக்கு காபி வழங்கும் திட்டம் நடைமுறைக்கு வந்துள்ளது.
யானைப்பாதை பகுதியில் இடும்பர் சந்நதி அருகே பிரத்யேகமாக தயாரிக்கப்படும் சுக்கு காபி, தினமும் அதிகாலை 4 மணி முதல் பகல் 1 மணி வரை பக்தர்களுக்கு விநியோகம் செய்யப்படுகிறது. மலை ஏறும் பக்தர்களுக்கு இது உடல் சோர்வைக் குறைப்பதுடன் குளிர் தாக்கத்திலும் நிவாரணம் அளிப்பதால், இந்த சேவையை பக்தர்கள் பாராட்டி வருகின்றனர்.
மேலும் ஐயப்ப சீசன் தொடங்கி இருப்பதால் அடுத்த சில வாரங்களில் பக்தர்கள் எண்ணிக்கை மேலும் அதிகரிக்கும் என கோயில் நிர்வாகம் தெரிவித்துள்ளது.
