மதுரை : வரும் ஆகஸ்ட் 21ஆம் தேதி மதுரையில் நடைபெறவுள்ள தமிழக வெற்றிக் கழகத்தின் இரண்டாவது மாநில மாநாட்டுக்கு, போலீசார் 27 நிபந்தனைகளுடன் அனுமதி வழங்கியுள்ளனர். அதில், “சர்ச்சைக்குரிய வகையில் பேசக்கூடாது” மற்றும் “ஜாதி, மத மோதலைத் தூண்டும் விதமாக பேசக்கூடாது” என்ற முக்கிய உத்தரவுகளும் இடம்பெற்றுள்ளன.
மாநாட்டில் நடிகர் விஜய் மட்டுமே பேசுவார் என கழகத்தினர் முன்பே அறிவித்திருந்தாலும், அவர் அரசைக் குறிவைத்து விமர்சனம் செய்யக்கூடாது என்பதற்காகவே இந்த நிபந்தனை விதிக்கப்பட்டதாக த.வெ.க.வினர் குற்றஞ்சாட்டுகின்றனர்.
மாநாடு நடைபெறும் மதுரை பாரபத்தி பகுதியில், மாநாட்டு ஏற்பாடுகள் தீவிரமாக நடைபெற்று வருகின்றன. இதற்கிடையில், போலீசார் வழங்கிய 27 நிபந்தனைகளில் முக்கியமானவை பின்வருமாறு:
மாநாட்டிற்கு வருபவர்கள் மதியம் 3.00 மணிக்குள் திடலுக்குள் நுழைய வேண்டும்.
வருபவர்கள் எந்த தலைவரின் தலைமையில் வருகிறார்கள் என்பதை போலீசாருக்கு தெரிவிக்க வேண்டும்.
மேடைக்கு செல்லும் பாதைகள் பாதுகாப்பாக, மேடு பள்ளம் இல்லாமல் இருக்க வேண்டும்.
விஜய் வருகை மற்றும் புறப்படும் பாதைகளில் இருபுறமும் தடுப்புச்சுவர் அமைக்க வேண்டும்.
கொடி, பேனர், அலங்கார வளைவு, பட்டாசு போன்றவற்றால் விபத்து ஏற்படும் வாய்ப்பு தவிர்க்கப்பட வேண்டும்.
மாநாட்டிற்கு வருவதும், புறப்படுவதும் ஊர்வலமாக நடைபெறக்கூடாது.
நெடுஞ்சாலைகளிலும் அதன் அருகிலும் பேனர், கொடி கம்பி, அலங்கார வளைவு வைக்கக்கூடாது.
மாநாட்டில் சர்ச்சைக்குரிய வகையில் பேசக்கூடாது.
ஜாதி, மத மோதலைத் தூண்டும் பேச்சுகள் இருக்கக்கூடாது.
இந்த 27 நிபந்தனைகளின் அடிப்படையில் மாநாடு நடைபெறவுள்ள நிலையில், அரசியல் வட்டாரங்களில் இந்த கட்டுப்பாடுகள் குறித்து விவாதம் கிளம்பியுள்ளது.
