சிவகங்கை மாவட்டம் திருப்பத்தூர் பேரூராட்சிக்குட்பட்ட அரசு மேல்நிலைப் பள்ளிகளில் பயிலும் மாணவ, மாணவியர்களுக்கு அரசின் விலையில்லா மிதிவண்டிகள் வழங்கும் விழா மற்றும் சாதனை மாணவர்களைக் கௌரவிக்கும் நிகழ்ச்சி நேற்று (ஜனவரி 9) கோலாகலமாக நடைபெற்றது. இதில் தமிழகக் கூட்டுறவுத்துறை அமைச்சர் கே.ஆர்.பெரியகருப்பன் கலந்துகொண்டு, அரசு நலத்திட்டங்களை வழங்கியதோடு, தனது சொந்த நிதியிலிருந்து மாணவர்களுக்குப் பணமுடிப்பு வழங்கி நெகிழ்ச்சியை ஏற்படுத்தினார்.
நாகப்பா மருதப்பா அரசு மகளிர் மேல்நிலைப் பள்ளியில் நடைபெற்ற இவ்விழாவில் பேசிய அமைச்சர், “ஒரு நாட்டின் உண்மையான வளர்ச்சி என்பது அந்த நாடு கல்விக்கு அளிக்கும் முக்கியத்துவத்தைப் பொறுத்தே அமைகிறது. இதனை உணர்ந்தே தமிழக முதலமைச்சர் அவர்கள் பள்ளிக்கு கல்வித்துறைக்கு ரூ.49 ஆயிரம் கோடியும், உயர்கல்வித் துறைக்கு ரூ.9 ஆயிரம் கோடியும் என மொத்தம் ரூ.58 ஆயிரம் கோடி நிதி ஒதுக்கீடு செய்து, இந்தியாவிலேயே தமிழகத்தை முதன்மை மாநிலமாக மாற்றி வருகிறார்” என்று பெருமிதத்துடன் குறிப்பிட்டார்.
திருப்பத்தூர் பகுதியில் உள்ள இரண்டு முக்கியப் பள்ளிகளைச் சேர்ந்த 375 மாணவ, மாணவியர்களுக்கு மொத்தம் ரூ.16,85,677 மதிப்பீட்டிலான விலையில்லா மிதிவண்டிகளை அமைச்சர் வழங்கினார். குறிப்பாக, நாகப்பா மருதப்பா மகளிர் பள்ளியில் 283 மாணவிகளுக்கும், ஆறுமுகம் பிள்ளை சீதையம்மாள் ஆண்கள் பள்ளியில் 92 மாணவர்களுக்கும் இந்த மிதிவண்டிகள் வழங்கப்பட்டன. மாணவர்கள் கல்வியில் மட்டுமன்றி விளையாட்டு மற்றும் தனித்திறன்களிலும் சிறந்து விளங்கி, தங்களது பெற்றோருக்கும் ஆசிரியர்களுக்கும் பெருமை சேர்த்திட வேண்டும் என அமைச்சர் அறிவுறுத்தினார்.
இவ்விழாவின் முத்தாய்ப்பாக, 2024-2025-ஆம் கல்வியாண்டில் பத்தாம் மற்றும் பன்னிரண்டாம் வகுப்பு பொதுத்தேர்வில் பள்ளியளவில் முதல் மூன்று இடங்களைப் பிடித்த மாணவர்களை ஊக்குவிக்கும் வகையில், அமைச்சர் தனது சொந்த நிதியிலிருந்து ஊக்கத்தொகையை வழங்கினார். அதன்படி, முதலிடம் பிடித்த மாணவர்களுக்குத் தலா ரூ.10,000, இரண்டாம் இடம் பிடித்தவர்களுக்குத் தலா ரூ.5,000 மற்றும் மூன்றாம் இடம் பிடித்தவர்களுக்குத் தலா ரூ.3,000 எனப் பணமுடிப்பு வழங்கப்பட்டது. மேலும், இரண்டு பள்ளிகளின் உட்கட்டமைப்பு வசதிகளை மேம்படுத்தப் பள்ளிக் கல்விக் குழுவின் புரவலர் நிதியாகத் தலா ரூ.10,000-த்தையும் தனது சொந்த நிதியிலிருந்து அவர் வழங்கினார்.
இந்நிகழ்வில் திருப்பத்தூர் பேரூராட்சித் தலைவர் கோகிலாராணி, மாவட்ட முதன்மை கல்வி அலுவலர் பாலதண்டாயுதபாணி, மாவட்ட கல்வி அலுவலர் மாரிமுத்து மற்றும் பள்ளித் தலைமையாசிரியர்கள், ஆசிரியர்கள், பெற்றோர்கள் எனப் பலர் கலந்து கொண்டனர். அரசின் திட்டங்களோடு அமைச்சரின் தனிப்பட்ட பங்களிப்பும் இணைந்த இச்செயல், அப்பகுதி மாணவர்களிடையே பெரும் உற்சாகத்தை ஏற்படுத்தியுள்ளது.
