கோவை கே.பி.ஆர் கலை அறிவியல் மற்றும் ஆராய்ச்சிக் கல்லூரியின் ‘கே.பி.ஆர் ஏர் ரைபிள் அகாடமி’ சார்பில், மாணவர்களின் ஆளுமை மற்றும் இலக்கு நிர்ணயிக்கும் திறனை மேம்படுத்தும் ‘திறன் முயற்சி 2026’ (Thiran Muyarchi 2026) என்ற பிரம்மாண்ட திறன் மேம்பாட்டுப் போட்டி மற்றும் பயிற்சி முகாம் கடந்த 5-ஆம் தேதி தொடங்கி 11-ஆம் தேதி வரை 7 நாட்கள் மிகச் சிறப்பாக நடைபெற்றது. கே.பி.ஆர் கல்விக் குழுமத்தின் தலைவர் டாக்டர் கே.பி. ராமசாமி தலைமையில் நடைபெற்ற இந்த நிகழ்வு, துப்பாக்கிச் சுடுதல் போன்ற நுணுக்கமான விளையாட்டுகள் மூலம் மாணவர்களிடையே ஒழுக்கம் மற்றும் ஒருமுகப்படுத்தும் திறனை வளர்ப்பதை நோக்கமாகக் கொண்டு அமைந்தது.
இந்த 7 நாள் திருவிழாவில், தமிழகத்தின் பல்வேறு பகுதிகளில் இருந்து 55-க்கும் மேற்பட்ட பள்ளிகள் மற்றும் கல்லூரிகளைச் சேர்ந்த மாணவ, மாணவிகள் ஆர்வத்துடன் பங்கேற்றனர். மேலும், தேசிய ரைபிள் சங்கம் (NRAI) மற்றும் சர்வதேச துப்பாக்கிச் சுடுதல் விளையாட்டு கூட்டமைப்பு (ISSF) சார்ந்த 15-க்கும் மேற்பட்ட அமைப்புகளின் பிரதிநிதிகள் கலந்துகொண்டு தொழில்நுட்ப ஆலோசனைகளை வழங்கினர். போட்டிகள் ஏர் ரைபிள் (Air Rifle), ஏர் பிஸ்டல் (Air Pistol) மற்றும் ஓபன் சைட் (Open Sight) ஆகிய மூன்று முக்கியப் பிரிவுகளில் நடத்தப்பட்டன.
தலைமைத்துவம், குழுப்பணி மற்றும் ஒட்டுமொத்த ஆளுமை மேம்பாட்டை ஊக்குவிக்கும் வகையில் வடிவமைக்கப்பட்ட இந்தப் போட்டிகளில், மொத்தம் 1174 மாணவ, மாணவிகள் தங்களது திறமையை வெளிப்படுத்தினர். இவர்களில் மிகச்சிறப்பாக இலக்கை எட்டிய 700-க்கும் மேற்பட்ட சாதனையாளர்கள் தேர்வு செய்யப்பட்டு, அவர்களுக்குத் தங்கம், வெள்ளி மற்றும் வெண்கலப் பதக்கங்கள் வழங்கி கௌரவிக்கப்பட்டனர். போட்டிகளின் நிறைவாக நடைபெற்ற பாராட்டு விழாவில், கே.பி.ஆர் கல்வி நிறுவனங்களின் செயலர் காயத்ரி அனந்தகிருஷ்ணன் வாழ்த்துரை வழங்க, கல்லூரியின் முதல்வர் கீதா சிறப்புரையாற்றினார்.
நிகழ்ச்சியில் சிறப்பு விருந்தினராகப் பங்கேற்ற 4 தமிழ்நாடு பட்டாலியன் நிர்வாக அதிகாரி மேஜர் ஜெம்ஸ்வின் ஜான்சன், வெற்றி பெற்றவர்களுக்குப் பதக்கங்களை அணிவித்துச் சிறப்பித்தார். அவர் பேசுகையில், துப்பாக்கிச் சுடுதல் என்பது வெறும் விளையாட்டு மட்டுமல்ல, அது மன உறுதியையும் நிதானத்தையும் கற்றுத்தரும் ஒரு கலை என்று மாணவர்களை ஊக்குவித்தார். விழாவின் இறுதி நிகழ்வாக, தேசிய மாணவர் படை (NCC) அதிகாரி லெப்டினன்ட் எஸ். ஸ்ரீதர், இம்மாபெரும் நிகழ்வை வெற்றிகரமாக நடத்த ஒத்துழைப்பு நல்கிய கல்வி நிர்வாகம், சிறப்பு விருந்தினர்கள், தன்னார்வலர்கள் மற்றும் 1174 பங்கேற்பாளர்கள் அனைவருக்கும் நன்றியினைத் தெரிவித்தார்.
