விழுப்புரம் தொகுதி மக்களின் கோரிக்கையை ஏற்று தார் சாலை பணி தரத்தை ஆய்வு செய்த விழுப்புரம் சட்டமன்ற உறுப்பினர் டாக்டர் இரா. லட்சுமணன் விழுப்புரம் கிழக்கு பாண்டி ரோடு, மகாராஜபுரம் பகுதியில் ரூ.35 லட்சம் மதிப்பீட்டில் நடைபெறும் தார் சாலை பணிகளை லட்சுமணன் எம்.எல்.ஏ., ஆய்வு செய்தார்.
விழுப்புரம் கிழக்கு பாண்டி ரோடு, மகாராஜபுரம் பகுதியில் தார் சாலை 300 மீட்டருக்கும் மேல் சேதமாகி பல மாதங்களாக குண்டும், குழியுமாக காணப்பட்டது. இந்த சாலை மழைகாலங்களில் சேறும், சகதியுமாகவும், மற்ற நேரங்களில் புழுதி பறந்தும் காணப்பட்டதால் இந்த வழியை கடக்கும் வாகன ஓட்டிகள், பொதுமக்கள் பெரிதும் சிரமப்பட்டனர். இந்த சாலையை சீரமைக்க கோரி, பொதுமக்கள், வாகன ஓட்டிகள் கோரிக்கை வைத்திருந்தனர். இது குறித்து, விழுப்புரம் சட்டமன்ற உறுப்பினர் டாக்டர் லட்சுமணன் எம்.எல்.ஏ., கலெக்டரின் கவனத்திற்கு கொண்டு சென்று நகராட்சி, நெடுஞ்சாலை துறை மூலம் புதிய தார் சாலை போடுவதற்கான நடவடிக்கையை எடுத்துள்ளார்.
இதையொட்டி, விழுப்புரம் கிழக்கு பாண்டி ரோடு, மகாராஜபுரம் ரெட்டியார் மில் பஸ் நிறுத்தம் அருகிலிருந்து 300 மீட்டர் நீளம், 7.50 மீட்டர் அகலம் கொண்ட ரூ.35 லட்சம் மதிப்பீட்டிலான தார் சாலை போடும் பணிகள் நெடுஞ்சாலை துறை சார்பில் நடைபெற்றது. இந்த பணிகளை லட்சுமணன் எம்.எல்.ஏ., ஆய்வு செய்து, சாலையை தரத்தோடு போட வேண்டும் என பணியில் ஈடுபட்டுள்ள ஊழியர்களுக்கு அறிவுறுத்தினார். நெடுஞ்சாலை துறை உதவி பொறியாளர் சிவசங்கரன், சாலை ஆய்வாளர் சோலையப்பன், கவுன்சிலர்கள் ஜெயந்தி மணிவண்ணன், மணவாளன், தி.மு.க., நகர செயலாளர் வெற்றிவேல் உட்பட நிர்வாகிகள் பலர் உடனிருந்தனர்.
