வாஷிங்டன் :
முன்னாள் அமெரிக்க அதிபர் ஜோ பைடனுக்கு தீவிரமான புரோஸ்டேட் புற்றுநோய் இருப்பது மருத்துவ பரிசோதனைகளில் உறுதி செய்யப்பட்டுள்ளது. குறிப்பாக, இந்த புற்றுநோய் தற்போது அவரது எலும்புகளுக்கும் பரவியுள்ளதாக தகவல்கள் வெளியாகியுள்ளன.
சமீபத்தில் அதிகரித்த சிறுநீரக சிக்கல்களால் மருத்துவ பரிசோதனைக்கு உட்படுத்தப்பட்ட பைடனுக்கு, புரோஸ்டேட் புற்றுநோய் இருப்பது கண்டறியப்பட்டது. கடந்த வெள்ளிக்கிழமை, இந்த நோயின் கிளீசன் ஸ்கோர் 9 (கிரேடு குழு 5) என மருத்துவர்கள் தெரிவித்தனர். இது நோயின் மிகுந்த தீவிரத்தைக் குறிக்கும். மேலும், புற்றுநோய் எலும்புகளுக்கும் பரவியிருப்பது குறிப்பிடத்தக்கது.
ஜோ பைடனின் அலுவலகம் வெளியிட்டுள்ள அறிக்கையில், “பைடன் மற்றும் அவரது குடும்பத்தினர் தற்போது சிகிச்சை திட்டங்களை குறித்து மருத்துவர்களுடன் ஆலோசித்து வருகின்றனர்,” என கூறப்பட்டுள்ளது.
ஜோ பைடனின் உடல்நிலை குறித்து கடந்த சில ஆண்டுகளாகவே ஊகங்கள் எழுந்துவந்தன. குறிப்பாக, கடந்த ஜூன் மாதத்தில் அவர் மீண்டும் ஜனாதிபதி வேட்பாளராக தேர்ந்தெடுக்கப்பட்ட பிறகு, நடைபெற்ற மேடை விவாதத்தில் அவரது செயல்திறன் குறைந்திருப்பதை பற்றி விமர்சனங்கள் எழுந்தன. இதனையடுத்து, பைடன் மீண்டும் தேர்தலில் போட்டியிட வேண்டாம் என முடிவெடுத்தார்.
பைடனின் புற்றுநோய் நிலைமையை அறிந்த முன்னாள் அதிபர் டொனால்ட் டிரம்ப், “பைடனின் மருத்துவ நிலைமையை அறிந்து வருத்தமடைகிறேன். அவர் விரைவில் குணமடைய வாழ்த்துகிறேன்,” என தெரிவித்துள்ளார்.
