தேர்தல் கால வாக்குறுதியின்படி, இடைநிலை பதிவு மூப்பு ஆசிரியர்களுக்குச் ‘சம வேலைக்குச் சம ஊதியம்’ வழங்க வலியுறுத்தி சிவகங்கை மாவட்ட ஆட்சியர் அலுவலக வளாகத்தில் 500-க்கும் மேற்பட்ட ஆசிரியர்கள் பங்கேற்ற பிரம்மாண்டப் போராட்டம் நடைபெற்றது. பள்ளிகள் திறக்கப்பட்ட முதல் நாளிலேயே ஆசிரியர்கள் பெருமளவில் திரண்டதால் கல்விப் பணிகள் பாதிக்கப்பட்டன.
தமிழகத்தில் கடந்த 2009-ஆம் ஆண்டு ஜூன் மாதத்திற்கு முன்னதாகவும், பின்னதாகவும் பணியில் சேர்ந்த இடைநிலை ஆசிரியர்களிடையே பெரும் ஊதிய முரண்பாடு நிலவி வருகிறது. ஒரே தகுதியுடன், ஒரே பணியைச் செய்த போதிலும், பின்னாளில் பணியில் சேர்ந்தவர்களுக்கு அடிப்படை ஊதியத்தில் பல ஆயிரம் ரூபாய் வித்தியாசம் உள்ளது. இதனைச் சரிசெய்து சம ஊதியம் வழங்க வேண்டும் என்பது கடந்த 15 ஆண்டுகாலப் போராட்டமாகும். தற்போதைய அரசு தனது தேர்தல் அறிக்கையில் இந்தக் கோரிக்கையை நிறைவேற்றுவதாக உறுதியளித்திருந்த நிலையில், அதை உடனடியாக அமல்படுத்தக் கோரி மாநிலம் தழுவிய போராட்டங்கள் தீவிரமடைந்துள்ளன.
சிவகங்கை மாவட்ட ஆட்சியர் அலுவலகத்தில் நடைபெற்ற இந்தப் போராட்டத்திற்கு, இடைநிலை பதிவு மூப்பு ஆசிரியர் சங்கத்தின் மாவட்டத் தலைவர் லோகநாதன் தலைமை தாங்கினார். மாவட்டச் செயலாளர் தாத்தப்பன், பொருளாளர் சிங்கராயர், துணைத் தலைவர் விஜயராஜ் மற்றும் துணைச் செயலாளர் செல்வக்குமார் ஆகியோர் முன்னிலை வகித்து கோரிக்கைகளை வலியுறுத்தி உரையாற்றினர்.
நேற்று விடுமுறை முடிந்து மாவட்ட அளவில் பள்ளிகள் மீண்டும் திறக்கப்பட்ட நிலையில், சுமார் 500-க்கும் மேற்பட்ட இடைநிலை ஆசிரியர்கள் விடுப்பு எடுத்து இந்தப் போராட்டத்தில் கலந்துகொண்டனர். இதனால் பல அரசுத் தொடக்க மற்றும் நடுநிலைப் பள்ளிகளில் வகுப்புகளை நடத்துவதில் சிக்கல் ஏற்பட்டது. “ஆறாவது ஊதியக் குழுவில் ஏற்பட்ட இந்த முரண்பாட்டால் நாங்கள் பொருளாதார ரீதியாகப் பெரிதும் பாதிக்கப்பட்டுள்ளோம். அரசு எங்களுடைய வாழ்வாதாரப் போராட்டத்திற்கு இனியும் செவிசாய்க்காவிட்டால், போராட்டத்தை அடுத்த கட்டத்திற்கு எடுத்துச் செல்வோம்” என ஆசிரியர்கள் எச்சரித்துள்ளனர்.
மாலையில் மாவட்ட வருவாய் அலுவலர் மற்றும் கல்வித் துறை அதிகாரிகள் போராட்டக்காரர்களுடன் பேச்சுவார்த்தை நடத்தினர். அரசின் கவனத்திற்கு இந்தக் கோரிக்கைகள் கொண்டு செல்லப்படும் என உறுதி அளிக்கப்பட்டதைத் தொடர்ந்து, ஆசிரியர்கள் தற்காலிகமாகப் போராட்டத்தைக் கைவிட்டனர். இருப்பினும், ஊதிய முரண்பாடு களையப்படும் வரை தங்களது அறப்போராட்டம் ஓயாது என அவர்கள் உறுதிபடத் தெரிவித்தனர்.