ஈரோடு மரப்பாலம் பகுதியில், தமிழக முன்னாள் முதலமைச்சர் ஜெயலலிதாவின் 78-வது பிறந்தநாளை முன்னிட்டு அனைத்திந்திய அண்ணா திராவிட முன்னேற்றக் கழகம் சார்பில் பிரம்மாண்ட பொதுக்கூட்டம் நடைபெற்றது. ஈரோடு மாநகர் மாவட்ட ஜெயலலிதா பேரவையினர் மிகச்சிறப்பாக ஏற்பாடு செய்திருந்த இந்த கூட்டத்திற்கு, பேரவை மாவட்டச் செயலாளர் சதீஷ்குமார் தலைமை தாங்கி உரையாற்றினார். மாநில பேரவை துணைச் செயலாளர் வீரக்குமார் முன்னிலை வகிக்க, முன்னாள் அமைச்சர்கள் செ.ம.வேலுச்சாமி மற்றும் கே.வி.ராமலிங்கம் ஆகியோர் சிறப்பு விருந்தினர்களாகக் கலந்துகொண்டு திமுக அரசின் தோல்விகளையும் அதிமுகவின் சாதனைகளையும் விளக்கிப் பேசினர்.
கூட்டத்தில் ஆவேசமாக உரையாற்றிய முன்னாள் அமைச்சர் செ.ம.வேலுச்சாமி, “மறைந்த மாபெரும் தலைவர்கள் எம்.ஜி.ஆர். மற்றும் ஜெயலலிதா ஆகியோர் பெண்களின் முன்னேற்றத்திற்காகப் புரட்சிகரமான பல நலத்திட்டங்களைச் செயல்படுத்தினர். அவர்களின் வழியில் வந்த எடப்பாடி கே.பழனிசாமி, நான்கரை ஆண்டுகள் தமிழகத்தில் பொற்கால ஆட்சியை நடத்தினார்,” என்று பெருமிதத்துடன் குறிப்பிட்டார். அதிமுக ஆட்சிக் காலத்தில் தமிழகம் அமைதிப் பூங்காவாகத் திகழ்ந்ததாகவும், சட்டம்-ஒழுங்கு மிகச்சிறப்பாகப் பாதுகாக்கப்பட்டதாகவும் தெரிவித்த அவர், தற்போதுள்ள திமுக ஆட்சியில் நாளுக்கு நாள் குற்றச் செயல்கள் அதிகரித்து வருவதாகக் கடும் குற்றச்சாட்டுகளை முன்வைத்தார். மேலும், திமுக அமைச்சர்கள் மீது அடுக்கடுக்கான ஊழல் புகார்கள் எழுந்து வருவதையும் அவர் சுட்டிக்காட்டினார்.
அதிமுக ஆட்சியில் கொண்டுவரப்பட்ட அத்திகடவு–அவிநாசி திட்டம் மற்றும் ஏழை மாணவர்களின் மருத்துவக் கனவை நனவாக்கிய 7.5 சதவீத உள் ஒதுக்கீடு உள்ளிட்ட வரலாற்றுச் சிறப்புமிக்க திட்டங்களை மக்கள் இன்றும் நன்றியுடன் நினைவுகூர்வதாக அவர் பேசினார். “எதிர்வரும் சட்டமன்றத் தேர்தலில் எடப்பாடி கே.பழனிசாமி மீண்டும் தமிழக முதல்வராகப் பொறுப்பேற்பதை எந்தச் சக்தியாலும் தடுத்து நிறுத்த முடியாது” என்று அவர் சூளுரைத்தார். இந்த எழுச்சிமிகு கூட்டத்தில் முன்னாள் சட்டமன்ற உறுப்பினர் கே.எஸ்.தென்னரசு, முன்னாள் நாடாளுமன்ற உறுப்பினர் செல்வகுமார சின்னையன், முன்னாள் மேயர் மல்லிகா பரமசிவம், முன்னாள் துணை மேயர் கே.சி.பழனிசாமி மற்றும் பேரவை வீரப்பன்சத்திரம் பகுதி செயலாளர் ஜெயராமன் உள்ளிட்ட மாவட்ட, மாநகர நிர்வாகிகள் மற்றும் ஆயிரக்கணக்கான அதிமுக தொண்டர்கள் திரளாகக் கலந்துகொண்டனர்.
