சென்னை:
தமிழகத்தை ஒரு ட்ரில்லியன் டாலர் பொருளாதாரமாக உயர்த்த பல்வேறு முயற்சிகளை மேற்கொண்டு வருவதாக முதலமைச்சர் மு.க. ஸ்டாலின் தெரிவித்துள்ளார்.
உலக முதலீட்டாளர்களை ஈர்க்க மாநில அரசு முதலீட்டாளர் மாநாடுகள், சந்திப்பு நிகழ்ச்சிகளை நடத்தி வரும் நிலையில், ஜெர்மனி மற்றும் இங்கிலாந்து நாடுகளுக்கு அரசு முறை வெளிநாட்டு பயணம் மேற்கொள்ள இன்று காலை சென்னை விமான நிலையம் வந்திருந்தார் முதலமைச்சர் ஸ்டாலின்.
அப்போது செய்தியாளர்களிடம் பேசிய அவர், விஜய் அரசியல் வருகை குறித்து கேட்கப்பட்ட கேள்விக்கு, “சொல்ல வேண்டிய அவசியம் இல்லை” என சுருக்கமாக பதிலளித்தார்.
அதேபோல், “2026 தேர்தலில் திமுகவிற்கும், தமிழக வெற்றி கழகத்திற்கும் தான் போட்டி” என விஜய் கூறியிருப்பதைப் பற்றி கேட்கப்பட்ட போது, “நான் அதிகம் பேசமாட்டேன்; சொல்வதை விட செயலில் காட்டுவேன்” என தெரிவித்துள்ளார்.
மேலும், புதிய கட்சிகள் கூட்டணியில் சேருமா என்ற கேள்விக்கு, “புதிய கட்சிகள் வருகிறார்களோ இல்லையோ, புதிய வாக்காளர்கள் வந்து கொண்டிருக்கிறார்கள்” என முதல்வர் ஸ்டாலின் பதிலளித்தார்.