சென்னை : பீஹார் மாநிலத்தைச் சேர்ந்த ஜியா குமாரி என்ற மாணவி, தமிழக பத்தாம் வகுப்பு பொதுத்தேர்வில் தமிழில் 93 மதிப்பெண்கள் எடுத்து சாதனை படைத்துள்ளார். இந்த சாதனையைத் தொடர்ந்து, அவருக்கு பல தரப்பிலிருந்து பாராட்டுகள் குவிந்து வருகின்றன.
சென்னை அருகே கவுல்பஜார் அரசு உயர்நிலைப் பள்ளியில் படித்து வரும் ஜியா, பத்தாம் வகுப்பு தேர்வில் மொத்தம் 467 மதிப்பெண்கள் பெற்றுள்ளார். தமிழில் மட்டும் 93 மதிப்பெண்கள் பெற்றிருப்பது குறிப்பிடத்தக்கது. ஜியா, பீஹார் மாநிலத்தைச் சேர்ந்த கட்டுமான தொழிலாளி தனஞ்சய் திவாரியின் மகள் ஆவார்.
வாடகை வீட்டிலும், உயர்ந்த கனவுகளும்
ஜியா தனது பெற்றோர் மற்றும் இரு சகோதரிகளுடன் சென்னையில் வாடகை வீட்டில் வசித்து வருகிறார். அவரது தந்தை கட்டுமான வேலை செய்து மாதம் சுமார் ரூ.10,000 மட்டுமே சம்பாதிக்கிறார். ஜியாவின் மூத்த சகோதரி ரியா 12-ம் வகுப்பு, இளைய சகோதரி சுப்ரியா 9-ம் வகுப்பு படிக்கின்றனர். மூவரும் தமிழில் சரளமாக பேசக்கூடியவர்களாக வளர்ந்துள்ளனர்.
“தமிழ், ஹிந்தியைவிட கடினம் ; ஆனால் பழகியதும் எளிது”
தனது அனுபவம் குறித்து ஜியா கூறும்போது, “என் அப்பா 17 வருடங்களுக்கு முன்னர் சென்னைக்கு வந்தார். பின்னர் நாங்களும் தமிழக அரசு பள்ளிகளின் இலவச கல்வி மற்றும் உணவுத் திட்டங்களை நம்பி சென்னைக்கு குடிபெயர்ந்தோம். தமிழ் முதலில் கடினமாக இருந்தது. ஆனால் பள்ளி நண்பர்களுடன் பேசுவதன் மூலம் மொழி கற்றுக்கொண்டேன். இப்போது தமிழே எனக்குச் சுலபமான பாடம். 11, 12-ம் வகுப்பிலும் தமிழ் பாடமே தேர்வு செய்வேன்,” என்றார்.
“நான் டாக்டர் ஆக விரும்புகிறேன்”
“நான் சமூகத்துடன் பழக வேண்டும் என்றால், அந்த இடத்தில் பேசப்படும் மொழியை கற்றுக்கொள்ள வேண்டும். அது எனக்கு உறுதியான நம்பிக்கையை அளித்தது. என் கனவு – டாக்டர் ஆக வேண்டும்” எனக் கூறினார்.
ஆசிரியர், தந்தையின் பாராட்டு
ஜியாவின் தமிழ் ஆசிரியர், “அவர் பேசும் தமிழை கேட்டால், பீஹாரில் பிறந்தவர் என்று யாரும் உணர முடியாது. அவரின் உச்சரிப்பும் புலமைக்கும் பாராட்டு சொல்ல வேண்டியது தான்” என்றார்.
ஜியாவின் தந்தை தனஞ்சய் திவாரி, “எனது மூன்று மகள்களும் கல்வியில் சிறந்து விளங்க வேண்டும் என்பதே என் ஆசை. ஜியா தமிழில் உயர்ந்த மதிப்பெண் பெற்றது என் குடும்பத்துக்கு பெருமை,” என மகிழ்ச்சியுடன் தெரிவித்தார்.
