தேனி மாவட்டம் கடமலை-மயிலை ஒன்றியத்திற்கு உட்பட்ட மலைக்கிராமங்களில் தற்போது இலவம் பிஞ்சு சீசன் களைகட்டத் தொடங்கியுள்ள நிலையில், ஆயிரக்கணக்கான வவ்வால்களின் படையெடுப்பால் பெரும் இழப்பைச் சந்திப்பதாக விவசாயிகள் வேதனை தெரிவித்துள்ளனர். வருசநாடு, ஓட்டணை, கோவிலாங்குளம், தங்கம்மாள்புரம், வாலிப்பாறை, சிங்கராஜபுரம் என நூற்றுக்கும் மேற்பட்ட கிராமங்களில் இலவந்தோப்புகள் அதிகளவில் பயிரிடப்பட்டுள்ள சூழலில், இரவு நேரங்களில் படையெடுக்கும் வவ்வால்கள் பிஞ்சுகளைக் கடித்துச் சேதப்படுத்துவது விவசாயிகளுக்குப் பெரும் சவாலாக மாறியுள்ளது.
ஒவ்வொரு ஆண்டும் கார்த்திகை முதல் மாசி மாதம் வரை நீடிக்கும் இந்த சீசன் காலத்தில், வவ்வால்கள் தோப்புகளுக்குள் புகுந்து பிஞ்சுகளைக் காயப்படுத்துவதால் மகசூல் பாதியாகக் குறையும் அபாயம் ஏற்பட்டுள்ளது. இதனால் இரவு முழுவதும் உறக்கமின்றித் தோப்புகளில் காவலுக்கு இருக்கும் விவசாயிகள், பட்டாசு வெடித்தும், தகர டப்பாக்களைத் தட்டிச் சத்தமிட்டும் வவ்வால்களை விரட்டப் போராடி வருகின்றனர். “ஆண்டுதோறும் இந்தத் தொல்லை நீடிக்கிறது, இதற்கு நிரந்தரத் தீர்வு காணத் தேனி மாவட்ட நிர்வாகம் உரிய மாற்று நடவடிக்கை எடுக்க வேண்டும்” என வருசநாடு பகுதி விவசாயிகள் கோரிக்கை விடுத்துள்ளனர்.
தற்போதைய சந்தை நிலவரப்படி, ஒரு கிலோ இலவம் பிஞ்சு ₹85 முதல் ₹100 வரை விற்பனையாகிறது. அதேபோல் இலவம் பஞ்சு கிலோ ₹90 முதல் ₹100 வரை விற்கப்படுகிறது. விலை படிப்படியாக உயர்ந்து வருவது விவசாயிகளுக்கு மகிழ்ச்சியைத் தந்தாலும், இடைத்தரகர்களின் தலையீடு லாபத்தைக் குறைப்பதாகக் குற்றம் சாட்டப்படுகிறது. இது குறித்து விவசாயி ரமேஷ் கூறுகையில், “மொத்த வியாபாரிகளும் இடைத்தரகர்களும் பிஞ்சுகளையும் பஞ்சையும் அடிமாட்டு விலைக்கு வாங்கி குடோன்களில் இருப்பு வைத்து, பின்னர் அதிக விலைக்கு விற்கின்றனர். உழைக்கும் விவசாயிகளுக்கு நியாயமான லாபம் கிடைப்பதை உறுதி செய்ய வேண்டும்” என்றார்.
கடந்த சில மாதங்களாக இருப்பு வைக்கப்பட்டிருந்த பொருட்களின் விலை உயர்ந்து வருவதால், இந்த ஆண்டு நல்ல லாபம் கிடைக்கும் என எதிர்பார்த்த விவசாயிகளுக்கு வவ்வால்களின் தொல்லை பேரிடியாக அமைந்துள்ளது. எனவே, வனத்துறையும் மாவட்ட நிர்வாகமும் இணைந்து வவ்வால்களைக் கட்டுப்படுத்தவோ அல்லது விவசாயிகளுக்கு உரிய நஷ்டஈடு வழங்கவோ முன்வர வேண்டும் என்பது இப்பகுதி மக்களின் ஒருமித்த எதிர்பார்ப்பாக உள்ளது. கடமலை-மயிலை ஒன்றியத்தின் பொருளாதாரமே இந்த இலவம் சாகுபடியைச் சார்ந்துள்ள நிலையில், அதிகாரிகள் எடுக்கும் நடவடிக்கையை நோக்கியே தற்போது அனைவரின் பார்வையும் திரும்பியுள்ளது.
