ஹைதராபாத்: எஸ்.எஸ். ராஜமவுலி இயக்கத்தில் பிரபாஸ், ராணா டகுபதி நடித்த ‘பாகுபலி’ திரைப்படம், இந்திய சினிமாவுக்கு புதிய வரலாற்றை எழுதிய படமாகும்.
2015-ல் வெளியான முதல் பாகமும், 2017-ல் வெளியான இரண்டாம் பாகமும் பாக்ஸ் ஆபிஸில் ரூ.1800 கோடிக்கு மேல் வசூல் செய்து, இந்திய சினிமாவையே தலைகீழாக மாற்றியது. பிரம்மாண்ட காட்சியமைப்பும், நட்சத்திர நடிகர்களின் ஆற்றலான நடிப்பும் ரசிகர்களை மயக்கியது.
10 ஆண்டுகள் கழித்து…
முதல் பாகம் வெளியாகி 10 ஆண்டுகள் நிறைவடைந்ததை முன்னிட்டு, படக்குழு சமீபத்தில் கொண்டாட்டம் நடத்தியது. அதையடுத்து, ‘பாகுபலி’ திரைப்படத்தை மீண்டும் திரையரங்கில் வெளியிட தயாரிப்பாளர்கள் முடிவு செய்துள்ளனர்.
ஆனால், இம்முறை இரண்டு பாகங்களையும் தனித்தனியாக அல்லாது, ஒரே திரைப்படமாக இணைத்து வெளியிட திட்டமிட்டுள்ளனர்.
புதிய பெயரில் வெளியீடு
‘BAAHUBALI: THE EPIC’ என்ற பெயரில், இரு பாகங்களையும் இணைத்துப் படம் வெளியாகவிருக்கிறது. இதற்கான டீசர் நேற்று வெளியிடப்பட்டது.
படக்குழு வெளியிட்ட அதிகாரப்பூர்வ அறிவிப்பில், அக்டோபர் 31-ம் தேதி இந்த மாபெரும் திரைப்படம் திரையரங்குகளில் மீண்டும் ரசிகர்களை சந்திக்கவிருக்கிறது என்று கூறப்பட்டுள்ளது.
ரசிகர்கள் உற்சாகம்
வெளிவந்து 10 ஆண்டுகள் ஆன பிறகும், ‘பாகுபலி’ மீதான ரசிகர்களின் ஈர்ப்பு குறைந்திருக்கவில்லை. ‘BAAHUBALI: THE EPIC’ என்ற பெயரில் மீண்டும் வெளிவருவது ரசிகர்களிடையே பெரும் உற்சாகத்தை ஏற்படுத்தியுள்ளது. இந்திய சினிமா ரசிகர்கள், இந்த ரீ-ரிலீஸுக்கும் நல்ல வரவேற்பு தந்தும், வசூலில் வெற்றி பெறச் செய்வார்கள் என்ற எதிர்பார்ப்பு எழுந்துள்ளது.
