சென்னை : இயக்குனர் ஏஆர் முருகதாஸ் – நடிகர் சிவகார்த்திகேயன் இணைந்து உருவாக்கிய மதராஸி திரைப்படத்தின் இசை வெளியீட்டு விழா சென்னையில் உள்ள தனியார் கல்லூரியில் கொண்டாடப்பட்டது.
அமரன் படத்தின் பெரும் வெற்றிக்குப் பிறகு, சிவகார்த்திகேயன் நடிப்பில் வெளிவரவுள்ள மதராஸி திரைப்படம் ரசிகர்களிடையே பெரும் எதிர்பார்ப்பை ஏற்படுத்தியுள்ளது. இந்தப் படத்தில் சிவகார்த்திகேயன் உடன் ருக்மினி வசந்த், விக்ராந்த், வித்யூத் ஜம்வால், பிஜு மேனன், ‘டான்சிங் ரோஸ்’ சபீர் உள்ளிட்டோர் முக்கிய கதாபாத்திரங்களில் நடித்துள்ளனர். ஸ்ரீ லட்சுமி மூவிஸ் தயாரித்துள்ள இப்படத்திற்கு அனிருத் இசையமைத்துள்ளார்.
திரைப்படம் வரும் செப்டம்பர் 5-ம் தேதி திரையரங்குகளில் வெளியாகவுள்ளது. சமீபத்தில் வெளியான டிரெய்லர் ரசிகர்களிடையே பரவலான வரவேற்பை பெற்றுள்ளது. சர்க்கார், தர்பார் படங்களுக்கு பின் இயக்குநர் ஏஆர் முருகதாஸுக்கு இது மிகப்பெரிய கம்பேக் என கருதப்படுகிறது.
அனிருத் பேச்சால் கண்ணீரடைந்த சிவகார்த்திகேயன் :
இசை வெளியீட்டு விழாவில் பேசிய இசையமைப்பாளர் அனிருத், தனது உரையில் சிவகார்த்திகேயனுடனான நட்பை நினைவுகூர்ந்தார்.
அவர் கூறியதாவது :
“மதராஸி படம், சிவகார்த்திகேயனுடன் எனது 8வது படம். எதிர்நீச்சல் படத்திலிருந்து நாங்கள் சேர்ந்து பயணிக்கிறோம். எங்களுடைய கேரியர் இரண்டுமே அந்தப் படத்திலிருந்து வளர்ந்தது. அதனால் அவருடைய படங்களுக்கு எப்போதும் எனக்கு ஒரு பிணைப்பு உண்டு. முதல் மாஸ் ஸ்கோர் செய்தது அவருக்குத்தான்.
சிவா என் மிக நெருங்கிய நண்பர். நல்ல மனசுக்காரர் என்பதால்தான் இன்று இவ்வளவு உயர்ந்திருக்கிறார். சினிமாவில் பலர் வருவார்கள், போவார்கள். ஆனால் சிவகார்த்திகேயன் மட்டும் நிலையாக இருப்பார். அவர் வெற்றி பெறும்போது, அது எனது வெற்றி போல எனக்கும் பெருமையாக இருக்கும்.
ஒருநாள் நான் ஃபீல்டில் இருந்து வெளியேறினாலும், அவர் ஜெயித்தால் அது எனது ஜெயம் மாதிரி உணர்வேன். மதராஸி படத்தில் ஒரு புதிய சிவகார்த்திகேயனை நீங்கள் காண்பீர்கள். டிரெய்லரில் வரும் வசனம் போல – ‘இது என் ஊரு சார்.. நான் வந்து நிற்பேன்’. அதுபோல இது என் எஸ்.கே., அவர் வந்து நிற்பார்” என உருக்கமாக பேசியார்.
அனிருத்தின் இவ்வுரையை கேட்ட சிவகார்த்திகேயன் கண்கலங்கிய நிலையில் காணப்பட்டார். இது இருவருக்குமிடையேயான நட்பின் ஆழத்தை வெளிப்படுத்தியது.