அறுபடை வீடுகளில் மூன்றாம் படை வீடான பழனி அருள்மிகு தண்டாயுதபாணி சுவாமி திருக்கோவிலில், உலகப்புகழ் பெற்ற தைப்பூசத் திருவிழா தற்போது மிகப்பிரம்மாண்டமாக நடைபெற்று வருகிறது. கடந்த மாதம் 26-ஆம் தேதி கொடியேற்றத்துடன் தொடங்கிய இந்த ஆன்மீகப் பெருவிழாவிற்கு, தமிழகத்தின் மூலை முடுக்குகளிலிருந்தும், வெளிமாநிலங்களிலிருந்தும் லட்சக்கணக்கான பக்தர்கள் பாதயாத்திரையாகவும், காவடி எடுத்தும் பழனியை நோக்கி வந்த வண்ணம் உள்ளனர். திருவிழா அதிகாரப்பூர்வமாகத் தொடங்குவதற்கு முன்பே, பொங்கல் பண்டிகை விடுமுறை நாட்களைப் பயன்படுத்திக் கொண்டு லட்சக்கணக்கான பக்தர்கள் சுவாமி தரிசனம் செய்துவிட்ட நிலையில், விழாவின் முக்கிய நிகழ்வான திருத்தேரோட்டம் நடைபெற்ற நேற்று பக்தர்களின் வருகை புதிய உச்சத்தைத் தொட்டது.
தைப்பூசத் திருநாளின் சிகர நிகழ்ச்சியான திருத்தேரோட்டத்தைக் காணவும், மலைக்கோவிலில் வீற்றிருக்கும் முருகப் பெருமானை தரிசிக்கவும் நேற்று அதிகாலை முதலே பக்தர்கள் கூட்டம் கட்டுக்கடங்காமல் இருந்தது. அடிவாரத்தில் இருந்து மலைக்கோவில் வரை எங்கு நோக்கினும் பக்தர்களின் தலைகளே தென்பட்டன. இந்நிலையில், நேற்று ஒரு நாளில் மட்டும் சுமார் 1 லட்சத்து 60 ஆயிரம் பக்தர்கள் மலைக்கோவிலில் சாமி தரிசனம் செய்துள்ளதாகக் கோவில் நிர்வாகம் அதிகாரப்பூர்வமாகத் தெரிவித்துள்ளது. அதிகாலை முதல் நள்ளிரவு வரை இடைவிடாது பக்தர்கள் நீண்ட வரிசையில் காத்திருந்து “அரோகரா” முழக்கத்துடன் தண்டாயுதபாணியை வழிபட்டனர். பக்தர்களின் வசதிக்காகக் கூடுதல் பாதுகாப்புப் பணிகளும், குடிநீர் மற்றும் சுகாதார வசதிகளும் கோவில் நிர்வாகத்தால் போர்க்கால அடிப்படையில் செய்யப்பட்டிருந்தன. தைப்பூசத் திருவிழாவின் எழுச்சியால் பழனி மாநகரமே பக்திப் பரவசத்தில் மூழ்கியுள்ளது.
