திருநெல்வேலி மாவட்டம் தேவர்குளம் அருகே, ஆன்மிகப் பெரியவர்கள் போல வேடமிட்டு வீட்டிற்குள் புகுந்து, மூதாட்டியை மிரட்டி நகையைப் பறித்துச் சென்ற நான்கு பேர் கொண்ட கும்பலைத் தனிப்படை போலீசார் அதிரடியாகக் கைது செய்துள்ளனர். ஆன்மிக நம்பிக்கையைச் சாதகமாக்கிக் கொண்டு அரங்கேற்றப்பட்ட இந்தத் துணிகர மோசடி சம்பவம் அப்பகுதி மக்களிடையே பெரும் அதிர்ச்சியை ஏற்படுத்தியுள்ளது.
நெல்லை மாவட்டம் தேவர்குளம் அருகே உள்ள கூவாச்சிபட்டி இந்திரா காலனியைச் சேர்ந்தவர் பழனியம்மாள். கடந்த ஜனவரி 6-ஆம் தேதியன்று, பழனியம்மாளின் வீட்டிற்கு நான்கு நபர்கள் வந்துள்ளனர். அவர்கள் பார்த்தால் அடையாளம் கண்டுகொள்ளக் கூடிய வகையில் காவி உடை அணிந்து, ஆன்மிகப் சொற்பொழிவாளர்கள் போலத் தங்களைக் காட்டிக்கொண்டுள்ளனர். பழனியம்மாளிடம் பேசிய அவர்கள், “உங்கள் குடும்பத்தில் தீராத கஷ்டங்கள் உள்ளன; இதற்கு வீட்டில் வைத்துச் சிறப்புப் பூஜை செய்தால் மட்டுமே தீர்வு கிடைக்கும்” என ஆசை வார்த்தை கூறி நம்ப வைத்துள்ளனர்.
அவர்களின் பேச்சை நம்பிய பழனியம்மாள் அவர்களை வீட்டிற்குள் அனுமதித்துள்ளார். உள்ளே சென்ற அந்த நான்கு பேரும், பூஜை செய்வது போலப் பாசாங்கு செய்துள்ளனர். திடீரென தங்களது சுயரூபத்தைக் காட்டிய அக்கும்பல், பழனியம்மாளைக் கொலை மிரட்டல் விடுத்துப் பயமுறுத்தியுள்ளது. பின்னர், பூஜை அறையில் வைக்கப்பட்டிருந்த குத்துவிளக்கில் அலங்காரமாக அணிவிக்கப்பட்டிருந்த வெள்ளி ருத்ராட்ச செயினைப் பறித்துக் கொண்டு அங்கிருந்து தப்பி ஓடிவிட்டனர்.
பாதிக்கப்பட்ட பழனியம்மாள் இது குறித்து உடனடியாகத் தேவர்குளம் காவல் நிலையத்தில் புகார் அளித்தார். புகாரைப் பெற்றுக்கொண்ட சப்-இன்ஸ்பெக்டர் ஆபிரகாம் ஜோசப், இது குறித்து வழக்குப் பதிவு செய்து தீவிரப் புலன் விசாரணையில் இறங்கினார். அப்பகுதியில் உள்ள கண்காணிப்புக் கேமரா காட்சிகள் மற்றும் ரகசியத் தகவல்களின் அடிப்படையில் விசாரணை நடத்தியதில், இந்தக் குற்றச் செயலில் ஈடுபட்டவர்கள் பக்கத்து மாவட்டமான தென்காசி மாவட்டம் ஆலங்குளம் பகுதியைச் சேர்ந்தவர்கள் என்பது உறுதி செய்யப்பட்டது.
அதனைத் தொடர்ந்து, தனிப்படை போலீசார் ஆலங்குளத்திற்குச் சென்று பதுங்கியிருந்த நான்கு பேரையும் சுற்றி வளைத்துக் கைது செய்தனர். அவர்களிடம் நடத்தப்பட்ட விசாரணையில் குற்றத்தை ஒப்புக்கொண்டதைத் தொடர்ந்து, அவர்கள் நீதிமன்றத்தில் ஆஜர்படுத்தப்பட்டுப் பாளையங்கோட்டை மத்தியச் சிறையில் அடைக்கப்பட்டனர். புகார் அளித்த சில நாட்களிலேயே குற்றவாளிகளைத் துரிதமாகக் கண்டறிந்த நெல்லை ஊரக உட்கோட்ட டி.எஸ்.பி. ரகுபதிராஜா, சப்-இன்ஸ்பெக்டர் மற்றும் காவலர்களை மாவட்டக் காவல் கண்காணிப்பாளர் (எஸ்.பி.) பிரசண்ணகுமார் நேரில் அழைத்து பாராட்டி வெகுமதி வழங்கினார். “அறிமுகம் இல்லாத நபர்களை ஆன்மிகம் அல்லது உதவி என்ற பெயரில் வீட்டிற்குள் அனுமதிக்கும் போது பொதுமக்கள் மிகுந்த எச்சரிக்கையுடன் இருக்க வேண்டும்” என மாவட்டக் காவல் நிர்வாகம் அறிவுறுத்தியுள்ளது.
