சென்னை :
“திமுக கூட்டணியில் குழப்பம் உண்டு ; செப்டம்பரில்தான் உண்மை தெரிய வரும்” எனக் கூறியுள்ளார் மத்திய அமைச்சர் மற்றும் தமிழக பாஜகவின் முக்கிய தலைவரான எல்.முருகன். புதிய தலைமுறைக்கு வழங்கிய பிரத்யேக பேட்டியில், “திமுக கூட்டணியில் இருந்து ஒரு கட்சி எங்களுடன் (பாஜக-அதிமுக கூட்டணியில்) சேர தயாராக இருக்கிறார்” என்றும் கூறியுள்ளார்.
அவரது இந்த கருத்து, தற்போது தமிழக அரசியலில் பெரும் விவாதமாகியுள்ளது. குறிப்பாக, மதிமுக பொதுச்செயலாளர் வைகோவா அல்லது விசிக தலைவர் திருமாவளவன்தானா? என்பதையே தற்போது அரசியல் வட்டாரங்கள் ஆராய்கின்றன.
ராஜ்யசபா இடமின்றி மதிமுகவில் சிறு அதிருப்தி ஏற்பட்டிருப்பது உண்மைதான். ஆனால் வைகோவின் மகன் துரை வைகோ, “அதிருப்தி இருந்தாலும், எங்கள் இருப்பிடம் திமுக கூட்டணிதான்” என கூறியிருக்கிறார். பாஜகவின் பழைய கூட்டணிப் பின்னணி இருந்தாலும், வைகோ தற்போது மாறுவார் என அரசியல் விமர்சகர்கள் நம்புவதில்லை.
விசிக தலைவர் திருமாவளவனை குறித்தும் சந்தேகங்கள் எழுந்துள்ளன. திமுக கூட்டணியில் விசிக அதிக வாக்குகளை பெற்றுக்கொடுத்தாலும், பெரிய பங்கு வழங்கப்படவில்லை என்கிற வேதனை இருக்கலாம். ஆனால், “இதற்காக விசிக பாஜகவில் செல்ல வாய்ப்பில்லை” என அரசியல் விமர்சகர் ரவீந்திரன் துரைசாமி கூறியுள்ளார்.
பாஜகவின் எண்ணம்
2024 பிப்ரவரியில் பாஜக, அதிமுகவிலிருந்து முக்கிய தலைவர்கள் சேர்வார்கள் என அறிவித்தது. ஆனால் அதற்கான சாத்தியக்கூறு நிகழவில்லை. இதனை நினைவூட்டிய பத்திரிகையாளர் செந்தில்வேல், “சிறு சலசலப்பை ஏற்படுத்தும் முயற்சியே இது” என விமர்சிக்கிறார்.
