சென்னை பெரம்பூர் பிஸ்ஸெட் சாலை ரயில்வே குடியிருப்பு பகுதியில் 765 கிராம் மெத்தம்பெட்டமைன் போதைப்பொருள் பறிமுதல் மூன்று பேர் கைது
சென்னை செம்பியம் காவல் நிலைய எல்லைக்குட்பட்ட பகுதியில் போதைப்பொருள் கடத்தல் நடைபெறுவதாக போலீசாருக்கு ரகசிய தகவல் கிடைத்தது. இதையடுத்து தனிப்படை போலீசார் தீவிர கண்காணிப்பில் ஈடுபட்டனர்.
பெரம்பூர் பிஸ்ஸெட் சாலை ரயில்வே குடியிருப்பு பகுதியில் சந்தேகத்திற்கிடமாக சுற்றித்திரிந்த நபர்களைப் பிடித்து சோதனை செய்தபோது, அவர்களிடம் இருந்து 765 கிராம் மெத்தம்பெட்டமைன் போதைப்பொருள் பறிமுதல் செய்யப்பட்டது.
முதற்கட்ட விசாரணையில், வேறு மாநிலத்தில் இருந்து போதைப்பொருளைக் கடத்தி வந்து சென்னையில் உள்ளூர் நபர்களுக்கு விற்பனை செய்ய முயன்றது தெரியவந்தது.
பறிமுதல் செய்யப்பட்ட 765 கிராம் மெத்தம்பெட்டமைன் போதைப்பொருளின் சர்வதேச சந்தை மதிப்பு சுமார் 30 லட்சம் ரூபாய் எனக் கூறப்படுகிறது.
இந்தக் கடத்தல் தொடர்பாக பெரம்பூரைச் சேர்ந்த பிரவீன் குமார், அயனாவரத்தைச் சேர்ந்த ஸ்ரீராம், எழும்பூரைச் சேர்ந்த முகமது இம்ரான் கான் உள்ளிட்டோரின் தொடர்பு குறித்து போலீசார் விசாரணை மேற்கொண்டனர்.
கடத்தலுக்குப் பயன்படுத்தப்பட்ட நான்கு செல்போன்கள் மற்றும் ஒரு மின்னணு எடை தராசு ஆகியவை பறிமுதல் செய்யப்பட்டன.
கைது செய்யப்பட்டவர்களை நீதிமன்றத்தில் ஆஜர்படுத்திய போலீசார், நீதிமன்றக் காவலில் சிறையில் அடைத்தனர்.







