தமிழக மாணவர்களின் நவீன கால டிஜிட்டல் திறன்களை மேம்படுத்தும் நோக்கில், தமிழ்நாடு முதலமைச்சரின் சீரிய முயற்சியால் உருவாக்கப்பட்ட “உலகம் உங்கள் கையில்” என்ற மகத்தான திட்டத்தின்கீழ் கிருஷ்ணகிரி மாவட்டத்தில் மடிக்கணினிகள் வழங்கும் பணி எழுச்சியுடன் நடைபெற்று வருகிறது. கிருஷ்ணகிரி அரசு மருத்துவக் கல்லூரி கலையரங்கத்தில் நடைபெற்ற பிரம்மாண்ட விழாவில், மாவட்ட கலெக்டர் தினேஷ் குமார் மற்றும் பர்கூர் சட்டமன்ற உறுப்பினர் தே.மதியழகன் ஆகியோர் கலந்துகொண்டு, தனியார் கல்லூரிகளில் இறுதியாண்டு பயிலும் 1,806 மாணவ, மாணவிகளுக்கு முதற்கட்டமாக மடிக்கணினிகளை வழங்கித் தொடங்கி வைத்தனர். இந்த அறிவுட்டும் கருப்பொருளின் கீழ், நவீன உலகின் சவால்களை எதிர்கொள்ளும் வகையில் அரசு மற்றும் தனியார் கல்வி நிறுவனங்களில் பயிலும் 10 லட்சம் மாணவர்களுக்கு மடிக்கணினிகள் வழங்கும் மெகா திட்டத்தை முதலமைச்சர் கடந்த ஜனவரி 5-ஆம் தேதி தொடங்கி வைத்ததை கலெக்டர் தினேஷ் குமார் தனது உரையில் நினைவுகூர்ந்தார்.
கிருஷ்ணகிரி மாவட்டத்தைப் பொறுத்தவரை, கல்விப் புரட்சியின் ஒரு பகுதியாக ஏற்கனவே அரசு கல்லூரிகளில் இறுதியாண்டு பயிலும் 4,522 மாணவர்களுக்கு மடிக்கணினிகள் வழங்கப்பட்டுள்ளன. இதன் தொடர்ச்சியாக தற்போது தனியார் கல்லூரிகளில் பயிலும் 6,864 மாணவர்களையும் சேர்த்து, மாவட்டம் முழுவதும் ஒட்டுமொத்தமாக 11,386 மாணவ, மாணவிகளுக்கு மடிக்கணினிகள் வழங்கப்பட்டு வருகின்றன. இதனைத் தொடர்ந்து, பர்கூர் அரசு பொறியியல் கல்லூரி கலையரங்கத்தில் நடைபெற்ற மற்றொரு நிகழ்ச்சியில், பர்கூர் சட்டமன்ற உறுப்பினர் தே.மதியழகன் அவர்கள் பங்கேற்று, பொறியியல் கல்லூரியின் இறுதியாண்டு மாணவர்கள் 225 பேர் மற்றும் பையூர் அரசு தோட்டக்கலை மற்றும் ஆராய்ச்சி நிலையத்தில் பயிலும் 70 மாணவர்கள் என மொத்தம் 295 பேருக்கு மடிக்கணினிகளை வழங்கி வாழ்த்தினார்.
இந்த அரசு விழாக்களில் மாவட்ட ஊரக வளர்ச்சி முகமை திட்ட இயக்குநர் கவிதா, கிருஷ்ணகிரி அரசு மருத்துவக் கல்லூரி முதல்வர் சத்யபாமா, பர்கூர் அரசு பொறியியல் கல்லூரி முதல்வர் திருநாவுக்கரசு மற்றும் பையூர் அரசு தோட்டக்கலைக் கல்லூரி முதல்வர் அனிசா ராணி ஆகியோர் முன்னிலை வகித்தனர். இந்நிகழ்வில் உள்ளாட்சி பிரதிநிதிகள், பல்வேறு கல்லூரிகளின் முதல்வர்கள், பேராசிரியர்கள் மற்றும் மாணவ, மாணவிகள் திரளாகக் கலந்து கொண்டனர். உயர்கல்வி பயிலும் மாணவர்களுக்குக் கிடைத்துள்ள இந்த டிஜிட்டல் கருவி, அவர்களின் வேலைவாய்ப்பு மற்றும் ஆராய்ச்சிப் பணிகளுக்குப் பெரும் பக்கபலமாக அமையும் என விழாவில் உரையாற்றியவர்கள் நெகிழ்ச்சியுடன் தெரிவித்தனர்.
