தென்காசி மாவட்டம் சங்கரன்கோவில் அருகே உள்ள குருவிகுளம் பகுதியில், தனியார் பள்ளி ஆசிரியர் ஒருவர் மர்ம நபர்களால் கடத்திச் செல்லப்பட்டு கொடூரமாக வெட்டிக் கொலை செய்யப்பட்ட சம்பவம் பெரும் பரபரப்பை ஏற்படுத்தியுள்ளது. இக்கொலை வழக்கின் பின்னணியில், சமூக வலைதளச் செயலிகள் மூலம் நபர்களைக் கவர்ந்து இழுத்துக் குற்றச் செயல்களில் ஈடுபடும் மர்ம கும்பல் இருக்கலாம் என்ற கோணத்தில் காவல்துறை தனது விசாரணையைத் தீவிரப்படுத்தியுள்ளது. நவீனத் தொழில்நுட்பங்களைப் பயன்படுத்தி அரங்கேற்றப்படும் இத்தகைய குற்றங்கள், கிராமப்புறப் பகுதிகளிலும் ஊடுருவி இருப்பது பொதுமக்களிடையே பெரும் அச்சத்தை ஏற்படுத்தியுள்ளது.
தென்காசி மாவட்டம் கரடிகுளம் சிலோன் காலனியைச் சேர்ந்தவர் சுதந்திரகுமார் (43). இவர் திருப்பூர் மாவட்டத்தில் உள்ள ஒரு தனியார் பள்ளியில் ஆசிரியராகப் பணியாற்றி வந்தார். விடுமுறைக்காகத் தனது சொந்த ஊருக்கு வந்திருந்த சுதந்திரகுமார், நேற்று முன்தினம் இரவு வெளியே சென்ற நிலையில் வீடு திரும்பவில்லை. இந்தச் சூழலில், குருவிகுளம் அருகே உள்ள காமாட்சிபுரம் பகுதியில் அவர் உடல் முழுவதும் வெட்டுக் காயங்களுடன் சடலமாகக் கண்டெடுக்கப்பட்டார். தகவல் அறிந்து சம்பவ இடத்திற்கு விரைந்து வந்த குருவிகுளம் போலீசார், உடலைக் கைப்பற்றிப் பிரேதப் பரிசோதனைக்காக அனுப்பி வைத்தனர். விசாரணையில், சுதந்திரகுமாருக்குத் திருமணமாகி தற்போது தனது மனைவியைப் பிரிந்து வாழ்ந்து வந்தது தெரியவந்துள்ளது.
காவல்துறையினரின் முதற்கட்ட விசாரணையில், ஓரினச்சேர்க்கையாளர்கள் பயன்படுத்தும் ‘கிரைண்டர்’ (Grindr) எனும் கைபேசி செயலி மூலம் சுதந்திரகுமாருக்கு மர்ம நபர்களுடன் தொடர்பு ஏற்பட்டது கண்டறியப்பட்டுள்ளது. இந்தச் செயலி வழியாக அறிமுகமான கும்பல், அவரைத் தனிமையான இடத்திற்கு வரவழைத்துக் கடத்திச் சென்று, பின்னர் கொலை செய்திருக்கலாம் எனப் போலீசார் சந்தேகிக்கின்றனர். சமீபகாலமாக இத்தகைய செயலிகள் மூலம் ஆசை வார்த்தைகளைக் கூறி வரவழைத்து, பணம் பறிப்பது அல்லது கொலை செய்வது போன்ற குற்றங்கள் அதிகரித்து வரும் நிலையில், சுதந்திரகுமார் கொலையிலும் அதே பாணி பின்பற்றப்பட்டுள்ளதா எனத் தொழில்நுட்ப வல்லுநர்களின் உதவியுடன் ஆய்வு செய்யப்பட்டு வருகிறது.
ஆசிரியரின் அலைபேசி அழைப்புகள் மற்றும் அந்தச் செயலியில் அவர் கடைசியாக யாருடன் உரையாடினார் என்பது குறித்த தரவுகளை போலீசார் சேகரித்து வருகின்றனர். “தனிப்பட்ட விருப்பு வெறுப்புகளைச் சாதகமாக்கிக் கொண்டு திட்டமிட்டு நடத்தப்படும் இத்தகைய குற்றக் கும்பல்களைப் பிடிப்பதற்கான தனிப்படை அமைக்கப்பட்டுள்ளது. விரைவில் குற்றவாளிகள் கைது செய்யப்படுவார்கள்” என மாவட்டக் காவல் கண்காணிப்பாளர் அலுவலக வட்டாரங்கள் தெரிவித்துள்ளன. கல்வியறிவு மிக்க ஆசிரியர் ஒருவரே இது போன்ற மர்மக் கும்பலிடம் சிக்கி உயிரிழந்த சம்பவம், இணையதளப் பயன்பாட்டில் உள்ள அபாயங்கள் குறித்த விழிப்புணர்வின் அவசியத்தை மீண்டும் ஒருமுறை வலியுறுத்தியுள்ளது.
