சமீப காலமாகத் தென்னிந்தியத் திரையுலகம் அதல பாதாளத்தை நோக்கிச் சென்று கொண்டிருப்பதாகவும், இதனால் இனி நடிகர்களுக்குக் கோடிக்கணக்கில் சம்பளம் கிடையாது; விகிதாச்சார அடிப்படையில்தான் ஊதியம் என்பதை வலியுறுத்த உள்ளதாகவும் தமிழ்நாடு திரையரங்கு மற்றும் மல்டிபிளக்ஸ் உரிமையாளர்கள் சங்கத் தலைவர் திருப்பூர் சுப்ரமணியம் அவர்கள் தெரிவித்துள்ளார். திருப்பூரில் செய்தியாளர்களுக்குப் பேட்டியளித்த அவர், தென்னிந்திய சினிமா எதிர்கொண்டுள்ள கடுமையான நிதி நெருக்கடி குறித்து விரிவாகப் பேசினார். திருப்பூர் சுப்ரமணியம் கூறியதாவது:
சமீப காலமாகத் தென்னிந்திய சினிமா அதல பாதாளத்துக்குச் சென்று கொண்டிருக்கிறது. பெரிய அளவிலான படங்கள் தற்போது வெளியாவதில்லை. ரூ.100 கோடி முதல் ரூ.150 கோடி வரை சம்பளம் வாங்கிய முன்னணி நடிகர்கள் பலர் இன்று வேலை இல்லாமல் வீட்டில் இருக்கின்றனர். இதற்குக் காரணம், இவ்வளவு அதிக சம்பளத்தைக் கொடுத்த நிறுவனங்கள் இன்று மூடப்பட்டுவிட்டன. திரையரங்குகளுக்குப் புதிய படங்கள் முழுமையாக வருவது இல்லை. கடந்த 5 ஆண்டுகளாக, புதிய திரைப்படங்களை வெளியிட்ட பிறகு 8 வாரங்கள் கழித்துத்தான் ஓ.டி.டி. தளத்தில் வெளியிட வேண்டும் என்று நாங்கள் கோரிக்கை விடுத்தோம். அதன் பாதிப்பு இப்போது வெளிப்படையாகத் தெரிகிறது.
திரைப்படத் தயாரிப்பின்போது, சிகை அலங்கார நிபுணருக்கு ‘பேட்டா’, ஹீரோவின் பவுன்சருக்கு ‘பேட்டா’, பெட்ரோல் செலவு என்று அனைத்தையும் தயாரிப்பாளரிடமே வசூலித்ததால், பல தயாரிப்பு நிறுவனங்கள் கடுமையான நஷ்டத்தைச் சந்தித்தன. இதன் காரணமாக, பல முன்னணி தயாரிப்பு நிறுவனங்கள் சொந்தமாகப் படம் எடுக்க விரும்பாமல் பின்வாங்கிக் கொண்டன. சினிமா தொழில் சீரடைய அவர் சில முக்கிய ஆலோசனைகளை முன்வைத்தார்:
பெரிய ஹீரோக்கள் தயாரிப்பாளர்களை நல்ல முறையில் பயன்படுத்திக் கொள்ள வேண்டும். வீண் செலவுகளைத் தவிர்த்தால் சினிமாத் தொழில் நிச்சயமாகச் சிறப்படையும். சிறு படங்கள் எடுப்பவர்கள்கூட கதைக்கருவை மையமாக வைத்துப் படமெடுக்கின்றனர். ஆனால், பெரிய படங்களோ நடிகர்களை மையப்படுத்தி மட்டுமே எடுக்கப்படுகின்றன. வெளியான படங்களில், மிகச் சில படங்கள்தான் ‘ரீ-ரிலீஸில்’ (Re-Release) வெற்றி கண்டு சாதித்தன.
இந்த நலிவில் இருந்து திரையுலகை மீட்கும் விதமாக, முக்கியமான ஒரு முடிவை வலியுறுத்த உள்ளதாக அவர் தெரிவித்தார்: “இனி நடிகர்களுக்குக் கோடிக்கணக்கில் சம்பளம் கிடையாது. படங்களின் வசூல் அல்லது இலாபத்தில் விகிதாச்சார அடிப்படையில்தான் ஊதியம் என்பதை வலியுறுத்த முடிவு செய்துள்ளோம்.”
இது தொடர்பாக, தயாரிப்பாளர்கள், விநியோகஸ்தர்கள், திரையரங்கு உரிமையாளர்கள் ஆகிய முத்தரப்பு நேரடிக் கூட்டத்தை விரைவில் நடத்தத் திட்டமிடப்பட்டுள்ளது. இந்தக் கூட்டத்தில், சினிமா துறையை நலிவில் இருந்து மீட்கத் தேவையான ஆலோசனைகள் வலியுறுத்தப்பட்டு, ஒரு நிரந்தரத் தீர்வு காணப்படும் என்று திருப்பூர் சுப்ரமணியம் அவர்கள் நம்பிக்கை தெரிவித்தார்.
