நாகப்பட்டினம் மாவட்டத்தில் உள்ள முத்தமிழறிஞர் டாக்டர் கலைஞர் கருணாநிதி மாவட்ட விளையாட்டரங்கில், தமிழக அரசின் சீரிய முயற்சியான முதலமைச்சர் இளைஞர் விளையாட்டுத் திருவிழா “இது நம்ம ஆட்டம் 2026“ மாவட்ட அளவிலான போட்டிகள் இன்று உற்சாகமாகத் தொடங்கின. ஏற்கனவே ஊராட்சி ஒன்றிய அளவில் நடைபெற்ற போட்டிகளில் வெற்றி பெற்றுத் திறமையை நிரூபித்த வீரர், வீராங்கனைகளுக்கான இந்த மாவட்ட அளவிலான போட்டிகளை, நாகப்பட்டினம் மாவட்ட கலெக்டர் ப.ஆகாஷ் கொடியசைத்துத் தொடங்கி வைத்தார். கடந்த ஜனவரி 27 மற்றும் 28 ஆகிய தேதிகளில் வேதாரண்யம், தலைஞாயிறு, கீழையூர், கீழ்வேளுர், திருமருகல் மற்றும் நாகப்பட்டினம் ஆகிய ஊராட்சி ஒன்றியங்களில் தடகளம், கையுந்துபந்து, எறிபந்து, கயிறு இழுத்தல், கேரம் மற்றும் கபாடி ஆகிய போட்டிகள் நடத்தப்பட்டன. அதில் முதலிடம் பிடித்து சாதனை படைத்த வெற்றியாளர்கள் இப்போது மாவட்ட அளவிலான களத்தில் தங்களது அடுத்தகட்டத் திறமையை வெளிப்படுத்தி வருகின்றனர்.
இந்த மாவட்ட அளவிலான விளையாட்டுத் திருவிழாவில் 6 ஊராட்சி ஒன்றியங்களிலிருந்தும் மொத்தம் 401 பேர் ஆர்வத்துடன் பங்கேற்றுள்ளனர். இதில் 206 வீரர்கள் மற்றும் 195 வீராங்கனைகள் அடங்குவர். போட்டிகளில் வெற்றி பெறுபவர்களை ஊக்குவிக்கும் விதமாக, முதல் பரிசாக ரூ. 6,000, இரண்டாம் பரிசாக ரூ. 4,000 மற்றும் மூன்றாம் பரிசாக ரூ. 2,000 எனப் ரொக்கப் பரிசுடன் சான்றிதழ்களும் வழங்கப்பட உள்ளன. இது மட்டுமின்றி, விழாவின் ஒரு பகுதியாக ஜனவரி 31-ம் தேதியான நாளை பெண்களுக்கான கோலப் போட்டி, இருபாலருக்கான ஓவியப் போட்டி மற்றும் மாற்றுத்திறனாளிகளுக்கான பிரத்யேக தடகளப் போட்டிகள் எனப் பல்வேறு போட்டிகள் நடத்தப்பட உள்ளன. அனைத்துப் போட்டிகளிலும் முதல் மூன்று இடங்களைப் பெறுபவர்களுக்கு மொத்தமாக ரூ. 10,08,000 மதிப்பிலான பரிசுத் தொகைகள் வழங்கப்பட உள்ளது குறிப்பிடத்தக்கது.
இந்நிகழ்ச்சியின் போது வீரர்களிடையே உரையாற்றிய கலெக்டர் ஆகாஷ், விளையாட்டுகளில் சிறந்து விளங்குவது உடல் நலத்திற்கு மட்டுமல்லாமல் மன உறுதிக்கும், தலைமைப் பண்பிற்கும் வழிவகுக்கும் என்று எடுத்துரைத்தார். இந்தத் தொடக்க விழாவில் மாவட்ட விளையாட்டு மற்றும் இளைஞர் நலன் அலுவலர் குமரன் மற்றும் பல்வேறு துறை சார்ந்த அரசு அலுவலர்கள், பயிற்சியாளர்கள் கலந்து கொண்டனர். நாகை மாவட்டத்தின் இளம் விளையாட்டுத் திறமைகளை அடையாளம் கண்டு அவர்களை மாநில அளவிற்குக் கொண்டு செல்லும் ஒரு முக்கியப் பாலமாக இந்த “இது நம்ம ஆட்டம் 2026“ விளையாட்டுத் திருவிழா அமைந்துள்ளது என விளையாட்டு ஆர்வலர்கள் மகிழ்ச்சி தெரிவித்துள்ளனர்.