ராமநாதபுரம் அருகே அமைந்துள்ள, “மண் முந்து நோக்கு புகழுடைய” திருத்தலமான திருஉத்தரகோசமங்கை மங்களநாத சுவாமி திருக்கோவிலில், உலகப் புகழ்பெற்ற ஆருத்ரா தரிசன விழா நேற்று மிகச்சிறப்பாக நடைபெற்றது. உலகில் முதலில் தோன்றிய கோவில் என்ற வரலாற்றுப் பெருமையைக் கொண்ட இத்தலத்தில், மூலவராக மங்களநாதரும் மங்களநாயகியும் அருள்பாலிக்கின்றனர். இக்கோவிலின் தனிச்சிறப்பாக விளங்குவது, ஆடும் கோலத்தில் காட்சியளிக்கும் சுமார் ஆறடி உயரமுள்ள அபூர்வ பச்சை மரகத நடராஜர் திருமேனியாகும். “மத்தளம் முழங்க மரகதம் உடைபடும்” என்ற கூற்றின்படி, ஒலி மற்றும் ஒளி அதிர்வுகளால் இந்த விலையுயர்ந்த மரகதத் திருமேனிக்கு பாதிப்பு ஏற்படக்கூடாது என்பதற்காக, ஆண்டு முழுவதும் இச்சிலை சந்தனக் காப்பினால் மூடப்பட்டிருக்கும். ஆண்டுக்கு ஒருமுறை மட்டுமே இந்தச் சந்தனம் களையப்பட்டு, மரகத மேனியாகப் பக்தர்களுக்குக் காட்சியளிப்பது வழக்கம். அந்த வகையில், நேற்று காலை 8:30 மணியளவில் வேத மந்திரங்கள் முழங்க, நடராஜரின் திருமேனியில் இருந்த பழைய சந்தனம் களையப்பட்டது.
சந்தனம் களையப்பட்ட பின்னர், மரகத நடராஜருக்கு பால், தயிர், இளநீர், தேன், சந்தனம், பன்னீர் உள்ளிட்ட 32 வகையான திரவியங்களால் மகா அபிஷேகம் விமரிசையாக நடைபெற்றது. வருடம் முழுவதும் நடராஜரின் திருமேனியை அலங்கரித்த இந்தச் சந்தனம், அபூர்வ மருத்துவ குணங்களைக் கொண்டது என்பது பக்தர்களின் நம்பிக்கையாகும். இதனால், அந்த மருத்துவச் சந்தனத்தைப் பிரசாதமாகப் பெறுவதற்கு ராமநாதபுரம் மட்டுமின்றி, தமிழகத்தின் பல்வேறு மாவட்டங்களில் இருந்தும் வருகை தந்த ஆயிரக்கணக்கான பக்தர்கள் நீண்ட வரிசையில் காத்திருந்து போட்டா போட்டி போட்டனர். விழாவையொட்டி, ராமநாதபுரம் சமஸ்தான தேவஸ்தான பரம்பரை அறங்காவலர்களான ராணி பிரம்மகிருஷ்ண ராஜராஜேஸ்வரி நாச்சியார் மற்றும் அபர்ணா நாச்சியார் ஆகியோரின் ஆலோசனையின் பேரில், திவான் பழனிவேல் பாண்டியன் தலைமையில் சிறப்பான வசதிகள் செய்யப்பட்டிருந்தன. மாவட்ட காவல் கண்காணிப்பாளர் சந்தீஷ் தலைமையில் பலத்த போலீஸ் பாதுகாப்பு போடப்பட்டிருந்ததுடன், பக்தர்களின் வசதிக்காகப் போக்குவரத்திலும் சில மாற்றங்கள் செய்யப்பட்டிருந்தன.
ஆருத்ரா தரிசன விழாவின் சிகர நிகழ்வாக, இன்று அதிகாலை சூரிய உதயத்திற்கு முன்னதாகவே அருணோதய காலத்தில், நடராஜருக்குச் சிறப்புப் பூஜைகள் செய்யப்பட்டு மீண்டும் புதிய சந்தனக்காப்பு சாத்தப்பட்டது. மங்கள இசை முழங்க நடைபெற்ற இந்த நிகழ்வில், ஆயிரக்கணக்கான பக்தர்கள் “தென்னாடுடைய சிவனே போற்றி” என முழக்கமிட்டு சுவாமி தரிசனம் செய்தனர். ஆருத்ரா தரிசன நாளை முன்னிட்டு இன்று அதிகாலை முதலே பக்தர்கள் கூட்டத்தால் திருஉத்தரகோசமங்கை திருத்தலமே விழாக்கோலம் பூண்டுள்ளது. பக்தர்களின் அடிப்படைத் தேவைகளான குடிநீர் மற்றும் சுகாதார வசதிகளைத் தேவஸ்தான நிர்வாகமும், உள்ளூர் அமைப்புகளும் இணைந்து மேற்கொண்டிருந்தன. ஓராண்டு காத்திருப்புக்குப் பிறகு மரகத மேனியைத் தரிசித்த பக்தர்கள், மனநிறைவுடன் இறைவனை வழிபட்டுச் சென்றனர்.
