பெங்களூரு :
17 ஆண்டுகளாக கண்ணீரிலும் கனவிலும் சுழன்ற ராயல் சேலஞ்சர்ஸ் பெங்களூரு (RCB) அணி, இந்த ஐபிஎல் 2025 சீசனில் “பழைய தவறுகளைத் தவிர்த்து புதிய தடத்தில்” பயணிக்கிறது. இந்த ஆண்டின் ஆர்சிபி, நட்சத்திர வீரர்கள் மீது சார்ந்த அணியல்ல — நெறிமுறையும் திட்டமுமாக செயல்படும் ஒருங்கிணைந்த அணியாக உருவெடுத்துள்ளது.
ஆர்சிபியின் அணிக்கட்டமைப்பில் மாற்றத்தைத் தூண்டியவர் முன்னாள் டைரக்டர் மைக் ஹெசன். ஐபிஎல் ஏலங்களில் “பெரிய பெயர்களை” தேடுவதைக் கைவிட்டு, அணிக்கு நீடித்த பயனளிக்கும் வீரர்களையே தேர்ந்தெடுத்தவர். சூப்பர் ஸ்டாரல்லாத ரஜத் படிதா போன்றோருக்கு வாய்ப்பு வழங்கப்பட்டு, அணியின் எதிர்காலத் திட்டம் அமைக்கப்பட்டது.
முன்னொரு காலத்தில் ஓரிரு போட்டிகளில் தோல்வி அடைந்தால், ஆர்சிபி வீரர்களை பெஞ்சில் அனுப்பி விடும் பழக்கம் வைத்திருந்தது. ஆனால், ஜிதேஷ் சர்மாவைப் போன்று தொடர்ச்சியாக வாய்ப்பு அளிக்கப்பட்ட வீரர்கள், முக்கிய போட்டிகளில் வெற்றி வாங்கித் தந்துள்ளனர். இது அணியின் மனப்பான்மை மாறியதை காட்டுகிறது.
பந்து வீச்சாளர்கள் மீது கவனம்
முன்னணி பேட்ஸ்மேன்களை தவிர்த்து, ஹேசில்வுட், புவனேஷ்வர் குமார், யஷ் தயால் போன்ற துல்லியமான பந்துவீச்சாளர்களை தேர்ந்தெடுத்து, பந்து வீச்சில் கட்டுப்பாடும் வெற்றியும் பெற்றுள்ளது ஆர்சிபி. ஹேசில்வுட் மட்டும் 18 விக்கெட்டுகளை வீழ்த்தியுள்ளார்.
தனிநபர் அல்ல, அணி ஓட்டும் அணிதான் இந்த RCB
இதுவரை விராட் கோலியைச் சுற்றியே RCB சுழல்ந்தாலும், இந்த ஆண்டு அவர் ஒரு கட்டுப்பாட்டு வீரராக இருப்பதுடன், மிடில் ஆர்டர், பவர் ஹிட்டர்கள் போன்றவை தங்களது வேலைபாடுகளை சிறப்பாக செய்துள்ளனர். கோலி 8 அரைசதங்களுடன் 602 ரன்கள் சேர்த்துள்ளார்.
வெவ்வேறு மைதானங்களில் வெற்றி
வெளியூர் மைதானங்களில் தொடர்ந்து ஏழு போட்டிகளில் வெற்றி பெற்ற ஆர்சிபி, முந்தைய சீசன்களைவிட அதிக நிலைத்தன்மை காட்டியுள்ளது. அணியின் ஒட்டுமொத்த செயல்திறனை எடுத்துக் காட்ட இது சிறந்த எடுத்துக்காட்டாக இருக்கிறது.
இந்த RCB பழைய RCB அல்ல. அணியை முழுமையாக்கும் முயற்சி, திட்டமிடல், மனப்பக்குவம் ஆகியவற்றின் விளைவாகவே இந்த ஆண்டு பிளேஆஃபில் முக்கிய இடத்தை பிடித்துள்ளனர். “செயலுக்கு ஏற்ற எதிர்வினை” என்றால் இந்த ஆண்டில் “ஈ சாலா கப் நம்தே” என்பது ஏற்கக்கூடியது.
