தஞ்சாவூர் :
தஞ்சாவூர் மாவட்டத்தில் இடைவிடாமல் பெய்து வரும் கனமழையால், சுமார் 1,700 ஏக்கரில் குறுவை மற்றும் சம்பா பருவ நெற்பயிர்கள் கடுமையாக சேதமடைந்துள்ளன. இதனால் பல்வேறு நெற்பயிர்கள் தண்ணீரில் மூழ்கி, சாய்ந்து நாசமடைந்துள்ளதாக விவசாயிகள் வலியுறுத்துகின்றனர்.
இந்நிலையில், தமிழக அரசு தினமும் 2,000 மூட்டைகள் நெல் கொள்முதல் செய்கிறோம் என தெரிவித்திருந்தாலும், அது உண்மைக்கு புறம்பான தகவல் என அ.தி.மு.க பொதுச் செயலாளரும் எதிர்க்கட்சித் தலைவருமான எடப்பாடி கே. பழனிசாமி கடுமையாக விமர்சித்துள்ளார்.
அவர் இன்று தஞ்சாவூர் மற்றும் திருவாரூர் உள்ளிட்ட டெல்டா மாவட்டங்களில் மழையால் பாதிக்கப்பட்ட நேரடி நெல் கொள்முதல் நிலையங்களை நேரில் பார்வையிட்டு, விவசாயிகளுடன் கலந்துரையாடினார்.
தஞ்சை காட்டூர் கொள்முதல் நிலையத்தில் நிலைமையை ஆய்வு செய்த பிறகு செய்தியாளர்களிடம் பேசிய அவர் கூறியதாவது :
“தஞ்சை காட்டூர் நிலையத்தில் கொள்முதல் பணிகள் மிகுந்த தாமதமாக நடைபெறுகின்றன. விவசாயிகள் 15 நாட்களாக நெல்மணிகளை குவித்து வைத்து காத்திருக்கின்றனர். மழையால் அவை நனைந்து முளைத்து வீணாகி வருகின்றன.
தமிழக அரசு தினமும் 2,000 மூட்டைகள் கொள்முதல் செய்கிறோம் என பொய்யான தகவலை வெளியிட்டு, விவசாயிகளை ஏமாற்றுகிறது. ஆனால் உண்மையில் வெறும் 800 மூட்டைகளே தினமும் கொள்முதல் செய்யப்படுகிறது.
லாரிகள் பற்றாக்குறை, இடவசதி இல்லாமை, கொள்முதல் தாமதம் ஆகிய காரணங்களால் விவசாயிகள் மிகுந்த இழப்பை சந்தித்து வருகின்றனர். இதனால், அவர்களுக்கான இந்த தீபாவளி ‘கண்ணீர் தீபாவளி’ ஆக மாறிவிட்டது.” என அவர் தெரிவித்தார்.
விவசாயிகள் சார்பில், “அரசு உடனடியாக நெல் கொள்முதல் பணிகளை விரைவுபடுத்தி, நமது நஷ்டத்திற்கான உரிய நிவாரணம் வழங்க வேண்டும்” என்ற கோரிக்கையும் வலியுறுத்தப்பட்டது.
