சபரிமலை ஐயப்பன் கோயிலில் பிரசித்தி பெற்ற மகர விளக்கு மற்றும் மகரஜோதி பெருவிழாவிற்காகக் கோயில் நடை திறக்கப்பட்ட முதல் 24 மணி நேரத்திலேயே பக்தர்களின் வருகை புதிய உச்சத்தைத் தொட்டுள்ளது. நேற்று முன்தினம் மாலை 5:00 மணிக்கு நடை திறக்கப்பட்டதிலிருந்து நேற்று மாலை 5:00 மணி வரையிலான ஒரு நாளில் மட்டும், ஆன்லைன் முன்பதிவு மூலமாக சுமார் 1,20,256 பக்தர்கள் ஐயப்பனைத் தரிசித்துள்ளனர். இதில் நடை திறக்கப்பட்ட முதல் நாளில் 57,256 பேரும், நேற்று மாலை 5:00 மணி வரை 63,000 பேரும் தரிசனம் செய்துள்ளதாகத் திருவிதாங்கூர் தேவஸ்வம் போர்டு தெரிவித்துள்ளது. மகர விளக்கு காலத்தின் மிக முக்கிய வழிபாடான நெய்யபிஷேகம் நேற்று அதிகாலை 3:15 மணிக்குத் தொடங்கியது. முன்னதாக அதிகாலை 3:00 மணிக்கு நடை திறக்கப்பட்டு, தந்திரி மகேஷ் மோகனரரு ஐயப்பனுக்கு முதல் நெய்யபிஷேகத்தைச் செய்து வைத்தார். அதனைத் தொடர்ந்து கணபதி ஹோமம் மற்றும் மகர விளக்கு காலத்தின் முதல் களபாபிஷேகம் உள்ளிட்ட சிறப்புப் பூஜைகள் வெகு விமரிசையாக நடைபெற்றன.
பக்தர்களின் வருகை தொடர்ந்து அதிகரித்து வருவதால், சன்னிதானம் மற்றும் பம்பை உள்ளிட்ட பகுதிகளில் பாதுகாப்புப் பணிகள் போர்க்கால அடிப்படையில் பலப்படுத்தப்பட்டுள்ளன. முதற்கட்ட பாதுகாப்புப் பணிகளுக்காக 10 டி.எஸ்.பி.,க்கள், 35 இன்ஸ்பெக்டர்கள் மற்றும் எஸ்.ஐ.,க்கள் உட்பட மொத்தம் 1,593 போலீசார் சன்னிதானத்தில் பாதுகாப்புப் பணியில் ஈடுபடுத்தப்பட்டுள்ளனர். ஒட்டுமொத்த பாதுகாப்பு ஏற்பாடுகளைக் கண்காணிக்கும் தனி அதிகாரியாக எஸ்.பி., எம். கிருஷ்ணன் நியமிக்கப்பட்டுள்ளார். கூட்ட நெரிசலைக் கட்டுப்படுத்தவும், மலைப்பாதையில் பக்தர்களுக்குத் தேவையான வசதிகளைச் செய்து தரவும் போலீஸ் மற்றும் தன்னார்வலர் குழுவினர் 24 மணி நேரமும் பணியமர்த்தப்பட்டுள்ளனர்.
வருகிற ஜனவரி 14-ஆம் தேதி சிகர நிகழ்வான மகரஜோதி தரிசனம் நடைபெற உள்ளது. அன்று மாலை தீபாராதனைக்குப் பிறகு பொன்னம்பல மேட்டில் ஜோதி தெரிவதுடன், வானில் மகர நட்சத்திரமும் பிரகாசிக்கும். கடந்த காலங்களில் புல்மேடு பகுதியில் ஏற்பட்ட விபத்து மற்றும் அசம்பாவிதங்களை மனதிற்கொண்டு, இந்த ஆண்டு மகரஜோதி நாளன்று பல அடுக்கு போலீஸ் பாதுகாப்பு வழங்கப்பட உள்ளது. ஜோதி தரிசனத்தன்று பக்தர்கள் வருகையை ஒரு குறிப்பிட்ட அளவிற்கு மேல் அனுமதிக்காமல் கட்டுப்படுத்தத் திட்டமிட்டுள்ளதாகப் போலீசார் தெரிவித்துள்ளனர். பக்தர்களின் பாதுகாப்பை உறுதி செய்யும் வகையில், சன்னிதானம் முதல் நிலக்கல் வரை சிசிடிவி கேமராக்கள் மூலம் தீவிரமாகக் கண்காணிக்கப்பட்டு வருகிறது.