“தமிழக அரசு, மாணவர் விடுதிகளின் பராமரிப்பு, உணவு, குடிநீர் வசதிகளை மேம்படுத்துவது போல கண்காட்சி நடத்தி வருகிறதா தவிர, உண்மையான நலனில் எந்த முதலீடும் செய்யவில்லை” என பாஜகவின் முன்னாள் மாநிலத் தலைவர் அண்ணாமலை கடுமையாக குற்றம்சாட்டியுள்ளார்.
தமது அறிக்கையில் அவர் கூறியதாவது :
“தமிழகம் முழுவதும் உள்ள ஆதிதிராவிடர் மற்றும் பழங்குடியினர் நலத்துறை மாணவர் விடுதிகள் மிக மோசமான நிலையிலுள்ளன. பராமரிப்பு இல்லாமல் இடிந்து விழும் நிலையில் காணப்படுகின்றன. மாணவர்கள் குடிநீர், கழிப்பறை, சுத்தம், உணவுத் தரம் குறித்த பல புகார்கள் எழுப்பி வருகின்றனர். ஆனால், அரசு எந்தவித கவனமும் செலுத்தவில்லை.”
தற்போது 1,331 விடுதிகளில் சுமார் 98,909 மாணவர்கள் தங்கியிருப்பதாக அரசு தெரிவித்துள்ளது. இவர்களுக்கான உணவுச் செலவாக 142 கோடி ரூபாய் ஒதுக்கப்பட்டுள்ளது. இது சராசரியாக ஒருவர் தினம் ₹39 எனும் கணக்காகும். ஆனால் அரசு, ஒருவர் தினம் ₹50 என உணவுப் படி வழங்குவதாகக் கூறி வருகிறது.
“தினம் ₹50 என்பது போதும் என்றாலும், உண்மையில் ₹39 மட்டுமே செலவிடப்படுகிறது. அதே நேரத்தில் மாணவர் நலத்தைப் பராமரிக்க மத்திய அரசு வழங்கும் நிதியையும் திருப்பி அனுப்பும் நிலை தி.மு.க. அரசுக்கு உள்ளது,” என்று அண்ணாமலை வலியுறுத்தினார்.
பயனின்றி பெயர் மாற்ற விளம்பரம்
“மாணவர் விடுதிகள் பெயரை மாற்றி விளம்பர இயக்கங்களை நடத்த அரசு ஆர்வம் காட்டுகிறது. ஆனால் அந்த விளம்பரத்துக்காக செலவிடும் தொகையில் 1% கூட மாணவர்கள் நலனுக்காகச் செலவிடுவதில்லை,” என்று அவர் சாடினார்.
2023-24 ஆம் ஆண்டில் விளம்பர செலவு ₹1.65 கோடியாக இருந்தது. இது 2024-25ல் ₹11.48 கோடியாக உயர்ந்தது. “பெயர் மாற்றத்துக்காக கோடிக்கணக்கில் செலவழிக்கிறார்கள். ஆனால் மாணவர்கள் உணவு, வசதி, பாதுகாப்பு – எதிலும் முன்னேற்றமில்லை” என்று அவர் விமர்சித்தார்.
கடந்த ஆண்டு திண்டுக்கல் மாவட்டம் ஆயக்குடியில் மாணவர் விடுதி மேல்மாடி இடிந்து விழுந்து, ஐந்து மாணவிகள் காயமடைந்த சம்பவம் இன்னும் மறக்க முடியாதது. “அத்தகைய அவல நிலையிலிருக்கும் விடுதிகளுக்கு மேலாண்மை செய்யாமல், விளம்பரங்களுக்கே முக்கியத்துவம் கொடுப்பது தி.மு.க. அரசின் உண்மை முகம்” என அவர் குற்றம்சாட்டினார்
