விருதுநகர் மாவட்ட பாரத ஸ்டேட் வங்கி (SBI) கிளை முன்பு, வங்கி ஊழியர் சங்கங்களின் ஐக்கிய கூட்டமைப்பு (UFBU) சார்பில், தங்களது நீண்ட கால கோரிக்கைகளை வலியுறுத்தி நேற்று எழுச்சிமிகு கவன ஈர்ப்பு ஆர்ப்பாட்டம் நடைபெற்றது. நிர்வாகி கபில்குமார் தலைமையில் நடைபெற்ற இந்த ஆர்ப்பாட்டத்தில், வங்கி ஊழியர்களின் பணிச் சூழலை மேம்படுத்தவும், குடும்ப நலனைக் கருத்தில் கொண்டும் வாரத்திற்கு ஐந்து நாட்கள் வேலை முறையை (5-Day Banking) உடனடியாக அமல்படுத்த வேண்டும் என்ற பிரதான கோரிக்கை முன்வைக்கப்பட்டது. இந்திய வங்கிகள் சங்கம் (IBA) மற்றும் மத்திய அரசுடன் எட்டப்பட்ட ஒப்பந்தங்களின்படி, அனைத்து சனிக்கிழமைகளுக்கும் விடுமுறை அளிக்கும் அரசாணையை விரைந்து வெளியிட வேண்டும் என ஊழியர்கள் வலியுறுத்தினர்.
இந்த ஆர்ப்பாட்டத்தில் தேசிய வங்கி ஊழியர் சம்மேளனம் சார்பில் செந்தில்குமார், அகில இந்திய வங்கி ஊழியர்கள் சங்கத்தின் சார்பாக நாராயணசாமி, வங்கி அதிகாரிகள் சங்கத்தின் பிரதிநிதி செந்தில்குமார் மற்றும் இந்திய வங்கி ஊழியர் சம்மேளனத்தின் மாரிக்கனி ஆகியோர் கலந்துகொண்டு சிறப்புரையாற்றினர். அப்போது அவர்கள் பேசுகையில், “தற்போதைய டிஜிட்டல் வங்கிச் சூழலில் ஊழியர்கள் கடும் பணிச்சுமைக்கு ஆளாகி வருகின்றனர். ரிசர்வ் வங்கி மற்றும் எல்.ஐ.சி போன்ற பொதுத்துறை நிறுவனங்களில் ஏற்கனவே நடைமுறையில் உள்ள இந்த ஐந்து நாள் வேலை முறையை, அனைத்து பொதுத்துறை மற்றும் தனியார் துறை வங்கிகளிலும் அமல்படுத்துவது ஊழியர்களின் மன அழுத்தத்தைக் குறைக்க உதவும்” என்று சுட்டிக்காட்டினர்.
போராட்டத்தில் பங்கேற்ற 65-க்கும் மேற்பட்ட வங்கி ஊழியர்கள், தங்களது கோரிக்கைகளை வலியுறுத்தி கண்டன முழக்கங்களை எழுப்பினர். ஊதிய உயர்வு ஒப்பந்தம் மற்றும் பென்ஷன் தொடர்பான இதர நிலுவைக் கோரிக்கைகளையும் விரைந்து முடிக்க வேண்டும் என்று சங்க நிர்வாகிகள் கேட்டுக்கொண்டனர். மாலையில் பணி நேரம் முடிந்த பிறகு நடைபெற்ற இந்த திடீர் போராட்டத்தால் ஸ்டேட் வங்கி அமைந்துள்ள பகுதியில் சிறிது நேரம் பரபரப்பு ஏற்பட்டது. மத்திய அரசு தங்களது கோரிக்கைகளுக்குச் செவிசாய்க்காத பட்சத்தில், அகில இந்திய அளவில் வேலைநிறுத்தப் போராட்டங்களில் ஈடுபடத் தயங்க மாட்டோம் என்றும் சங்க நிர்வாகிகள் எச்சரிக்கை விடுத்தனர்.
