“இபிஎஸ் தலைமையில்தான் கூட்டணி” அமித்ஷா வருகை தமிழக அரசியலில் மாற்றத்தை ஏற்படுத்தும்  நயினார் நாகேந்திரன் அதிரடி!

தமிழகத்தில் 2026 சட்டமன்றத் தேர்தலுக்கான அரசியல் களம் இப்போதே சூடுபிடிக்கத் தொடங்கியுள்ள நிலையில், தேசிய ஜனநாயகக் கூட்டணியின் நிலைப்பாடு மற்றும் தொகுதி பங்கீடு குறித்து பாஜக மாநிலத் தலைவர் நயினார் நாகேந்திரன் எம்.எல்.ஏ. மிக முக்கியமான விளக்கங்களை அளித்துள்ளார். ஆங்கிலப் புத்தாண்டை முன்னிட்டு கன்னியாகுமரி பகவதி அம்மன் கோயிலில் சாமி தரிசனம் செய்த அவர், பின்னர் செய்தியாளர்களிடம் பேசுகையில், வரும் ஜனவரி 4 மற்றும் 5 ஆகிய தேதிகளில் மத்திய உள்துறை அமைச்சர் அமித்ஷா தமிழகம் வரவிருப்பதாகத் தெரிவித்தார்.

அமித்ஷாவின் இந்தப் பயணம் வெறும் ஆன்மீகப் பயணம் மட்டுமல்ல, இது தமிழக அரசியலில் ஒரு மிகப்பெரிய திருப்புமுனையை ஏற்படுத்தும் என நயினார் நாகேந்திரன் குறிப்பிட்டார். ஜனவரி 4-ஆம் தேதி திருச்சி வரும் அமித்ஷா, புதுக்கோட்டையில் நடைபெறும் ‘தமிழனின் தலைநிமிர்’ நிகழ்ச்சியின் நிறைவு விழாவில் பங்கேற்கிறார். அதனைத் தொடர்ந்து ஜனவரி 5-ஆம் தேதி ஸ்ரீரங்கம் கோயிலில் தரிசனம் செய்துவிட்டு, அங்கு நடைபெறும் சமூகப் பொங்கல் விழாவிலும் கலந்துகொள்கிறார். அமித்ஷாவின் இந்த இரண்டு நாள் வருகை, பாஜக தொண்டர்களிடையே உற்சாகத்தை ஏற்படுத்துவதோடு, தேர்தல் பணிகளுக்கான தொடக்கப் புள்ளியாகவும் அமையும் என எதிர்பார்க்கப்படுகிறது.

கூட்டணி மற்றும் தொகுதி பங்கீடு குறித்த கேள்விக்கு பதிலளித்த அவர், “தமிழகத்தில் எடப்பாடி பழனிசாமி (இபிஎஸ்) தலைமையில்தான் தேசிய ஜனநாயகக் கூட்டணி தற்போது அங்கம் வகிக்கிறது. இருப்பினும், தொகுதி பங்கீடு குறித்து இதுவரை எந்த இறுதி முடிவும் எடுக்கப்படவில்லை. பொங்கல் பண்டிகைக்குப் பிறகு இது தொடர்பான அதிகாரப்பூர்வ அறிவிப்புகள் வெளியாகும்” என்றார். நடிகர் விஜய்யின் தமிழக வெற்றிக் கழகத்தை (தவெக) பாஜக கூட்டணிக்கு அழைப்பீர்களா என்ற கேள்விக்கு, “பொறுத்திருந்து பார்ப்போம்” எனச் சுருக்கமாகப் பதிலளித்து மர்மம் நீடிக்கச் செய்தார்.

மேலும், நெல்லையில் செய்தியாளர்களிடம் பேசிய அவர், அதிமுக-வில் ஓ.பி.எஸ். மற்றும் இ.பி.எஸ். மீண்டும் இணைய வேண்டும் என்பதே தனது விருப்பம் என்றும், அவர்கள் இருவரும் இணைந்து தேர்தலைச் சந்திப்பது பலமான கூட்டணியை உருவாக்கும் என்றும் தெரிவித்தார். நடிகர் விஜய் குறித்து விமர்சித்த அவர், “கரூரில் விபத்தில் 41 பேர் இறந்ததற்காகத் தீபாவளியைக் கொண்டாட வேண்டாம் எனத் தொண்டர்களுக்கு உத்தரவிட்ட விஜய், கிறிஸ்துமஸ் பண்டிகைக்கு மட்டும் வாழ்த்துச் சொல்கிறார். இதன் மூலம் அவர் ஒரு தரப்பினருக்கு மட்டும் ஆதரவாகச் செயல்படுகிறாரோ என்ற சந்தேகம் எழுகிறது” எனக் குற்றம் சாட்டினார். தமிழகத்தில் போதைப்பொருள் புழக்கம் மற்றும் வடமாநிலத்தவர் மீதான தாக்குதல்கள் அதிகரித்து வருவதாகக் கவலை தெரிவித்த அவர், சட்டம் ஒழுங்கை நிலைநாட்ட அரசு தவறிவிட்டதாகவும் சாடினார்.