அண்ணா வளர்த்த தமிழ் அல்ல.. ஆழ்வார்கள் வளர்த்த தமிழ் : அமைச்சர் ரகுபதி பேச்சுக்கு தமிழிசை கடும் பதில்

சென்னை: தமிழக சட்ட அமைச்சர் ரகுபதி தெரிவித்த கருத்துகள் குறித்து முன்னாள் ஆளுநர் தமிழிசை செளந்தரராஜன் தமது ‘எக்ஸ்’ தளத்தில் கடும் கண்டனம் தெரிவித்துள்ளார். தமிழ் மொழியும் இந்து மத பாரம்பரியமும் குறித்து அமைச்சர் பேசிய விதம் தவறான புரிதலை ஏற்படுத்துவதாக அவர் குற்றம் சாட்டியுள்ளார்.

அவரது பதிவில், “தமிழை இந்துமதத்திலிருந்து பிரித்து காட்டும் வகையில் அமைச்சர் ரகுபதி பேசியிருப்பது கவலைக்குரியது. ஆழ்வார்களும் நாயன்மார்களும் இந்த தமிழ் மொழியின் வளர்ச்சிக்காக பெரும் பங்கு வகித்தவர்கள். ஆண்டாளின் பாசுரங்களே தமிழின் பெருமையை உலகுக்கு எடுத்துக் காட்டின. அண்ணா மட்டும் தமிழை வளர்த்தார் என்ற கருத்து சரியானது அல்ல,” என்று தமிழிசை தெரிவித்துள்ளார்.

மேலும், “முதல்வர் எத்தனை முருகன் கோவில்கள் சென்று உள்ளார்? முருகன் திருவிழாக்களுக்கு வாழ்த்து தெரிவிக்காதது ஏன்? அரசியல் நோக்கத்திற்காக இந்து மதத்தையும், தேவையற்ற வகையில் முருகன் பக்தியையும் பிரிக்கும் முயற்சி நடைபெறுகிறது. இதை மக்கள் ஏற்றுக்கொள்ள மாட்டார்கள்,” என்று அவர் கூறியுள்ளார்.

பாஜக தமிழகத்தை ‘ஹிந்துத்துவ பரிசோதனை கூடம்’ என மாற்றுகிறது என்ற அமைச்சரின் குற்றச்சாட்டையும் தமிழிசை முற்றாக மறுத்துள்ளார். “உண்மையில் இந்துக்களை வேதனையைச் சந்திக்கச் செய்கிறது திமுக அரசு தான். 2026 தேர்தலில் திமுக எதிர்கொள்ளும் தோல்விக்குப் பின்னர் அவர்களின் நிலைமை வேதனைக் காலமாக மாறும்,” என்று தமிழிசை பதிவில் வலியுறுத்தியுள்ளார்.