நாமக்கல் மாவட்டம் திருச்செங்கோடு கே.எஸ்.ரங்கசாமி கலை அறிவியல் கல்லூரியின் காட்சித் தொடர்பியல் துறை (Visual Communication) சார்பில், மாணவர்களின் கலைத்திறனை மேம்படுத்தும் நோக்கில் ‘நடிப்புக்கலையின் அடிப்படை அம்சங்கள்’ குறித்த பிரம்மாண்ட இருநாள் பயிற்சிப் பட்டறை அண்மையில் நடைபெற்றது. இக்காலக்கட்டத்தில் ஊடகத்துறையில் நுழைய விரும்பும் மாணவர்களுக்கு நடிப்பும், உணர்வுகளை வெளிப்படுத்தும் விதமும் மிக முக்கியமான தேவையாக உள்ள நிலையில், அதனை முறையான வல்லுநர்களைக் கொண்டு பயிற்றுவிக்கும் பொருட்டு இந்தப் பயிற்சி ஒருங்கிணைக்கப்பட்டது. கே.எஸ்.ஆர் கல்வி நிறுவனங்களின் தாளாளர் ஆர்.சீனிவாசன் மற்றும் துணைத்தாளாளர் கே.எஸ்.சச்சின் சீனிவாசன் ஆகியோரின் மேலான வழிகாட்டுதலின்படி நடைபெற்ற இந்தப் பயிற்சிப் பட்டறையின் தொடக்க விழாவிற்கு, கல்வி நிறுவன நிர்வாக இயக்குநர் வி.மோகன் மற்றும் கல்லூரி முதல்வர் எம்.பிரசன்னா ராஜேஷ்குமார் ஆகியோர் தலைமை வகித்தனர். காட்சித் தொடர்பியல் துறைத்தலைவர் பா.கணேஷ் பிரபு, சிறப்பு விருந்தினராக வருகை தந்திருந்த புகழ்பெற்ற திரைப்பட நடிகர் சண்முகராஜாவை மாணவர்களுக்கு அறிமுகம் செய்து வைத்து வரவேற்புரை ஆற்றினார்.
தொடக்க விழாவில் சிறப்புரையாற்றிய நிர்வாக இயக்குநர் வி.மோகன், உலக சினிமா மற்றும் தமிழ் சினிமாவின் பரிணாம வளர்ச்சி குறித்து மாணவர்களிடையே விரிவாகப் பேசினார். பழைய கருப்பு-வெள்ளை காலத் திரைப்படங்களுக்கும், இன்றைய நவீன தொழில்நுட்பத் திரைப்படங்களுக்கும் இடையிலான கலை நயம் மற்றும் திரைக்கதை அமைப்பில் ஏற்பட்டுள்ள மாற்றங்களை அவர் விளக்கினார். குறிப்பாக, ஒரு நடிகர் திரையில் ஏற்று நடிக்கும் கதாபாத்திரமானது பார்வையாளர்களின் மனதில் எவ்வாறு ஆழமான தாக்கத்தை ஏற்படுத்துகிறது என்பதையும், சமூக மாற்றத்திற்கான கருத்துகளை நடிகர்கள் தங்களின் நடிப்பின் மூலம் மக்களிடம் கொண்டு சேர்த்த விதம் குறித்தும் தனது அனுபவங்களைப் பகிர்ந்து கொண்டார். அவரைத் தொடர்ந்து பேசிய கல்லூரி முதல்வர் எம்.பிரசன்னா ராஜேஷ்குமார், “நடிப்பு என்பது வெறும் கேமராவிற்கு முன்னால் நிற்பது மட்டுமல்ல; அது சக மனிதர்களின் உணர்வுகளைப் புரிந்து கொள்ளும் ஒரு நுணுக்கமான கலை. இது மாணவர்களின் சுயசிந்தனை மற்றும் தன்னம்பிக்கையை வளர்க்கும் ஆற்றல் கொண்டது” எனத் தெரிவித்தார்.
இரண்டு நாட்களாக நடைபெற்ற இந்தப் தீவிரப் பயிற்சி வகுப்பில், திரைக்கலைஞர் சண்முகராஜா மாணவர்களுக்கு நேரடிப் பயிற்சிகளை வழங்கினார். நடிப்பின் மிக முக்கியமான அங்கங்களான உடல் மொழி (Body Language), குரல் வளம் மற்றும் ஏற்ற இறக்கங்கள் (Voice Modulation), ஒரு கதாபாத்திரத்தின் தன்மையை உள்வாங்குதல், உணர்ச்சிகளைத் தத்ரூபமாக வெளிப்படுத்துதல் மற்றும் மேடை அச்சத்தைப் போக்கி தன்னம்பிக்கையுடன் செயல்படுதல் போன்ற அடிப்படை நுணுக்கங்களை அவர் செய்முறை விளக்கங்களுடன் பயிற்றுவித்தார். திரைப்படத் துறையில் ஒரு சிறந்த கலைஞராக உருவெடுக்கத் தேவையான ஒழுக்கம் மற்றும் அர்ப்பணிப்பு குறித்தும் அவர் மாணவர்களுடன் கலந்துரையாடினார். இந்தப் பயனுள்ள பயிற்சிப் பட்டறையில் பல்வேறு துறைத் தலைவர்கள், காட்சித் தொடர்பியல் துறைப் பேராசிரியர்கள் மற்றும் திரளான மாணவர்கள் கலந்துகொண்டு பயனடைந்தனர். இத்தகைய பயிற்சிகள் மாணவர்களின் எதிர்கால ஊடகப் பயணத்திற்கு ஒரு வலுவான அடித்தளமாக அமையும் எனப் பேராசிரியர்கள் பாராட்டு தெரிவித்தனர்.
